Ich Alber von Puchhaim tu^en chunt mit disem brief allen la^euten, di nu sind oder hernach chu^enftig werdent, daz ich mit meiner hausfrawen ver agnesen vnd mit meiner paider Su^en pilgreims vnd albers gu^eten willen han gegeben ze rechter aigenschaft dem Gotshaws datz sand florians haus, dem ich paz dann dhainem andern Chloster meins aigen gan, mein Swaig datz Aeug, die bei dem Manse leit, mit alle dem, daz darzu geho^ert, ez sey gepaun oder vngepawn, versucht oder vnversucht oder wie ez genant sey mit gantzem nutz also, daz si damit schaffen schullen allen iren frumen. darvmb han ich genomen von dem selben Gotshaws achtzikch phunt phenning wienner mu^enzz vnd han ez auch getan durch meiner sel willen, wann mier ander la^eut mer darvmb gegeben hieten, wann danne menschleich gesla^echt zu allen zeiten fleizzet sich mishelung, daz demselben Chloster an dem vorgenanten aigen von mier oder von dhaim meinen erben dhain chrieg furbaz icht auf ste, so han ich dem Probst Aynweigen, der sein werfer ist gewesen, vnd seiner Sammung gegeben zu einem vrchunt disen bvief versigilten mit meinem Insigel vnd mit meiner vorgenanten sun paider Insigel Vnd sind dez gezeug her hainreich von volkchensdorf, her Chunrat von Chapelle, her hainreich von Lonstorf, her Ru^eger von Hu^ette, her Perchtolt von Harthaim, her Espein von Hag, her Reicher von Perchhaimb, her Leutolt von wald, her Otte von V°tzing, Vlreich der Chraier, Heinreich der Jacober, Gebhart plu^emel, Albrecht wolfstain, herwort Chremsdorffer, Ru^eger der Pernawer, Fridreich der Swainpekch, Hainreich der hierttal vnd alle frum la^eut, den ez chunt wiert getan, ditz dinch ist geschehen, do von vnsers herren gepu^erd waren vergangen Tausent iar, dreuhundert iar vnd darnach in dem nachsten iar an sand Vlreichs Abent.

Source Fulltext: OÖUB 4 (Wien 1867) S. 398-399, Nr. 429