Ich Hainreich von volkenstorf von Nvnhouen tu^en chunt mit disem brief allen la^euten, die in ansehent oder ho^erent lesen, daz ich mit gutem willen meiner erben Ortolfs vnd hatmars, Elspetten, Katrein vnd agnesen han gesatzzt herren aymbeigen dem probst datz sand florians haus vnd seiner samnung ein lehen vnd ein Mu^el bey dem Sippache, daz mit gemeinem namen haizzet amme aigen, da der dingpekch ê waz aufgesezzen, vmb viertzig phunt wienner mu^enzz, vnd han daz getan mit sogetanem gelu^eb, die weil ich oder dhainer meiner erben demselben Gotshaus die vorgenanten phenning an sand Merteins tag nicht wider ga^eben, so schol der probst vnd die Samnung dez selben Chloster daz vorgenant aigen haben in rechter aigens gewer. Gescha^ech aber daz, daz demselben Chloster an der aigenschaft oder an dem satz mit recht icht ab gieng, so schol ich oder mein erben, sey ich nicht, demselben gotshaus für di selben phenning ein ander gut antwurten, auf swelches si danne zaigent, vnd schullen daz selb so lang inne haben, vntzt daz man in wider ledig mach daz selb aygen oder daz man in viertzig phunt phenning widergeb. vnd daz di selbe red vnd daz selb gescha^eft, als hie beschaiden ist, sta^et beleib oder mit nichten müg verchert werden, so han ich dem vorgenanten chloster disen brief geben versigilt (mit) meinem insigel, dazzu gib ich auch gezevg vber daz selb gescha^eft alle, die hie geschriben sint, daz ist mein veter der hainreich von volkensdorf, her Chunrat von Chapell, her Ru^eger von Hu^ette, her Aespein von Hag, her perhtolt von Harthaimb, her Reicher von perchaimb, her leutolt von wald, her Ott der wolfstain, her dietmar der wolfstain, her Otto von Vtzing, Albrecht Wolfstain, Fridreich Wolfstain, Seyfried von waliching, dietreich von prukk, Hartweig von Prukk, hainreich der Chalnberger, Fridreich der Swainpekch, Chalhoch vnd Ortolf von Zirknaren, Hainreich der Hierttel vnd ander piderb la^eut, die ez gesehen oder gehort habent. Ditz dinch ist geschehen, do von vnsers herren gepurd waren vergangen Tau ent iar vnd dreihundert iar vnd zwai iar an sand agnesen tag.

Source Fulltext: OÖUB 4 (Wien 1867) S. 405-406, Nr. 436