Ich Levtolt von chv^enring vnd Schench in Osterreich tuen chvnd allen den, di disen prief sechent oder ho^erent lesen, daz vu^er mich chomen ist Her Hainreich cho^erherr ze sand florians haus vnd pharrer ze sand Michel in der wachawe, vnd einn prief mit im pracht, den ich gegeben heet dem erwern herrn hern Albrechten Techent ze ardaker vnd pharrer ze sand michel, dem Got genad vnd pat svnderleich durch Got, daz ich den selben prief ernewet vnd westet im vnd seiner pruderschaft ewichleich. der prief stuend also, daz der selb herr her albrech vu^er mich chom in Offentaedig vnd pat vrogen einer gemainen vrtail, Ob iemen mecht mit recht einen zins von einem aigen avf ein ander aigen gelegen an des willen, den der zins angehöret, oder ob iemen einen zins getailen mv^ege an des willen, den der zins angehoret, oder ob iemen ein aigen versetzen mv^eg oder verchaufen, da ein zins auffleit an des wizzen, den der zins angehoret? daz ward var mier widertailt van dienstmann, van rittern, van chappen (sic), van purgern vnd ward avch der vrtail da geuolget. Daz recht ernewe vnd westet ich dem pharrer vnd dem Gotshaus ze sand michel vu^erbaz ewichleich. Swer der ist, der dehainen zins, der den pharrer angeho^eret, an seinen willen getailet hat, oder dehainen zins an sein wizzen auf ein ander eigen hat gelet, der in angeho^eret, den selben gepeut ich pei meinen hulden vnd pei allem recht, swann her Hainreich der pharrer ze sand michel oder wer pharrer da ist, sein gepresten var offen taidig vu^er leg, daz si iner virzechen tagen sich verslichten mit dem pharrer, tvend si des nich, so gepeut ich allen meinen richtern, daz si sich vnderwinden des aigens, da sand michel vnd dem pharrer vnrecht angeschehen ist, vnd haben daz in ier gewald so lange, vnz daz dem pharrer volzz recht geschech, auch sv^eln di richter miner wandel nicht vergezzen.

Source Fulltext: OÖUB 4 (Wien 1867) S. 470-471, Nr. 506