Ich Chvnrat von Polnheim vnd ich Dymu°t des vorgenanten havsvrow vnd alle vnser chint vergechen vnd tv^en chvnt allen den, di disen prif lesent oder ho^erent lesen, daz wir mit einem veraintem mv^et di hv^eb datz vreihaim, di vnser aigen ist, vnd den pov^engarten, der da pei leit, vnd alles daz, daz dar zu geho^ert, iz sei versv^echt oder vnuersv^echt, ze chovfen haben gegeben Probst Aynweigen vond sand florians hovs vnd seiner samnvng vmb drev vnd dreisich phvnt vnd vmb ein halbes, dar vber hab wir dem vorgenanten probst vnd der vorgenanten samnvng daz vor genant gv^et gesezzet vmb sechtzk phvnt phenning wienner mv^ense vnd schv^ellen avch der phenning ir gewern sein, swa in des dvrft ist nach landes recht also, sw°as in an der gwerschaft ab get mit recht, daz schv^ellen si haben vnuerschaidenlich ab einem avf den andern vnd avf allen dem, daz wir haben in dem lant. Daz dem vorgenanten Probst vnd der samnvng div red stet vnd vnuerchert beleib, geb wir in disen prif versigelten mit vnsers vrivnt insigel hern Heinrichs von volkenstorf, den wir darvmb gebeten haben, vnd ich Chv^enrat von Polnheim mit meinem insigel ze einem vrchv^end vnd zv einer ewigen bestetigung. des ist zivg her Heinrich von volchenstorf, her Heinrich von lonstorf, her Chvnrat von Chappelle, her Rv^eger von Hv^ett, her Perchtolt von Hartheim, her Espen von Hag, her Reicher von Percheim, Heinrich von volchenstorf, Peter von Hartheim, vlrich der chreer, willhalm, fridreich, wolfkanch genant von Chersperch. Der prif ist gegeben, do von Christes pvrd vergangen warn Tavsent iar vnd driv hvndert iar in dem virden iar an sand Andres tag.

Source Fulltext: OÖUB 4 (Wien 1867) S. 469-470, Nr. 505