Reuerendis in christo patribus dominis et amicis domino Ainwico uenerabili preposito, Heinrico decano Totique Conuentui domus sancti Floriani Perchtoldus dei gracia prepositus, Vlricus decanus Totusque conuentus Ecclesie sancti Johannis in Walthausen cum deuotis orationibus sinceram et fraternam in domino karitatem. Pensantibus nobis et animo sollicite reuoluentibus, quod uita hominum uelut nuncius precurrens et tanquam vmbra transeat sicque uelut nauis, cuius vestigium in aquis fluctuantibus non cognoscitur et tanquam avis ae¨ra transuolans, cuius itineris argumentum penitus ignoratur, ita et homo iam floridus et amenus in ictu oculi velut lanugo, que flatu venti tollitur et tanquam fumus diffusus in aere in nichilum quodammodo redigatur nec sciri possit, quis nostrum dignus sit odio uel amore — uisum fuit nobis super omnia expedire, vt viri spiritales, qui ea solum querere debent, que sursum sunt non que super terram, decurrentia vite sue tempora sic preordinent, sic prouideant, sic disponant, vt labore suo sic transitorio quietem perpetuam valeant emercari. Ad quod utique fiendum nichil adeo credimus profuturum, quam ut fusis pro inuicem piis obsecracionibus placabilem sibi reddant supernum iudicem, qui in ira misericordie recordatur. Si enim secundum statum exterioris hominis, qui sibimet quoddam prestare potest arnminiculum, in caritate iubemur inuicem documentis apostolicis supportare, videtur oportunius et multo saluti congruencius, vt interior homo noster, qui disiunctus a corpore nichil sibi prodesse poterit, bonorum operum exercitiis et caritatiuis orationum suffragiis adiuuetur. Cum igitur religiosorum Ecclesie federe singularis delectionis adunate vigili Cura semper ad hoc intendere debeant, vt qui nexu carnalis amoris hic fideliter coniunguntur, solutis etiam corporibus in spiritu feliciter congregentur, ecce nos iuxta salubrem aliorum ordinum consuetudinem ad vnionem nostre fraterne fidei vos recipientes decreuimus vobis cunctisque vestris successoribus tam in vita quam in morte plenum dare participium orationum, piarum actionum, que per nos ex nunc in antea operata fuerint clemencia saluatoris. Ad hoc nichilominus uobis astringi volentes, vt si quis confratrum vestrorum fraterni amoris gratia vel alio quocunque casu Ecclesiam nostram visitare voluerit, in Infirmitorio sev alias, vbi Prelati placuerit, se recipere debeat Prebendam ibidem, que nostris fratribus ministrari solet, integraliter percepturus, nisi forte ipse Prelatus hospitalitatis gratia vberiora sibi caritatis beneficia in mensa propria voluerit exhibere. Statuimus etiam, vt cum uestri Consorcii aliquis vocante domino decesserit sacerdotum, Camerarius vel alter habens ordinare de vestibus mortuorum, diem obitus eiusdem nostro Monasterio precio baioli de vestibus ipsius defuncti recepto debeat intimare. Prepositus vero vel decanus audita morte fratris defuncti mane Capitulum canuocabit et lecta littera; coram eis, vniuersi capitulares pro absolutione eiusdem fratris disciplinam recipiant corporalem dicendo interim illos psalmos, qui pro nostris fratribus et benefactoribus dici in Capitulo consueuerunt. Qui autem capitulares non fuerint, sive clerici fuerint uel conuersi, de manu decani finito capitulo similem recipiant disciplinam. Quo facto ipse decanus nomen defuncti libro ascribi faciet mortuorum. In eadem etiam nocte, si festum non impediat, cum sollempni compulsacione maiores vigilie contabuntur et Missa in mane conmuniter pro defunctis singulis etiam Sacerdotibus missas nichilominus Legentibus in sequestro. Quod si forte aliquem eodem die ex casu abstinere contigerit die, que proximo sibi vacauerit, supplere tenebitur, quod neglexit. Si autem festum aliquod interueniens in ipsa nocte, qua mors defuncti nunciata fuerit, vigilias impediat siue missam, fiet nocte, que vacauerit, subsequente. Infra cuius etiam tricennarium quilibet nostrorum sacerdotum tres Missas pro defuncto tenebitur celebrare. Alii vero sacerdotii karacterem non habentes vnum legant psalterium, conuersi autem et sorores trecenta dicant Pater noster Salutationem beate uirginis cuilibet adiungentes. Item si aliquis fratrum uestrorum infra sacerdocium constitutus aut certe conuersus vel soror viam vniuerse carnis fuerit ingressus, nunciato nobis eiusdem obita quinque psalmi consueti cum collecta pro requie ipsius in Capitulo dicentur fietque eadem nocte in vigiliis et mane in missa ipsius comemoracio specialis. Sacerdotum autem quilibet vnam infra ebdomadam proximam, nisi legitime prepeditus fuerit, dicet missam, Alii vero infra sacerdocium existentes pro eodem legant vigilias, conuersis et sororibus adiuncta salutacione beate virginis Centum dicentibus Pater noster. Fratres etiam vestros et benefactores defunctos a tam salubris statuti gratia nolentes excludere Missam vnam defunctorum promissis maioribus vigiliis et sollempni conpulsacione pro omnibus eisdem in vigilia beati Andree apostoli statuimus annis singulis celebrandam. In quo etiam die, vbi videlicet fieri solet memoria mortuorum, Kalendario sic volumus annotare: Conmemoratio confratrum et sororum de congregacione Domus sancti Floriani defunctorum. verum cum et nos adhuc in carne viuentes diuine bonitatis misericordia simus egentes, vt status nostrarum Ecclesiarum tam in rebus quam etiam in personis saluus et incolumis deoque placitus perseueret, placet nobis, ut quilibet sacerdos nostrorum Conuentuum tres missas, vnam de sancta Trinitate, alteram de beate virgine, terciam de omnibus Sanctis ita, ut hec collecta: Deus, qui caritatis dona prime semper collecte sub una iungatur conclusione infra aduentum domini deuote et in preter misse perpetuo debeat celebrare. Constituti vero infra sacerdocium vnum legant psalterium, conuersi quoque et sorores per singulas ebdomadas aduentus domini cum salutacione beate virginis dicant Cencies Pater noster. Et ne quispiam nobis succedentium de ignorancia huius religiosi uoti valeat excusari, ipsam formam conpromisse fraternitatis libro regule annotari fecimus in die, que vigiliam Sancti Andree precedit, in nostris Capitulis annis singulis pro leccione regule recitandam Nichilominus hoc addentes, quod siquis de nostris Consorciis ductus desidia huius laboris socius existere noluerit, sit etiam a gratia, que sequitur, penitus alienus, sicut nomen eiusdem alteri Monasterio, cum obierit, non scribatur, sed proprie Ecclesie suffragiis tantummodo sit contentus. Si vero aliquis ad portanda premissi laboris onera sese obligauerit et per effectum id ipsum explere non curauerit, vtpote delusor fraterne fidei cum dathan et abyron sorbeatur. Formam igitur eiusdem confraternitatis vestro reponendam Sacrario cum nostris Sigillis in seripto redactam uestre caritati transmisimus petentes, vt et vos similem cnutionem cum vestris Sigillis nobis super eodem caritatis vinculo remittatis. Acta sunt autem hec in Walthausen. Anno domini M.°CCC.° VI.°

Source Fulltext: OÖUB 4 (Wien 1867) S. 515-518, Nr. 554