Ne ea, que aguntur in tempore, simul labantur cum tempore, expedit ea scripture ac testium presidio perhennari. Hinc est, quod Ego Herbvrgis vxor Chunradi Schachnarii Ciuis in ybsa notum fieri cupio vniuersis tam presentibus quam futuris, ad quos peruenerit presens scriptum, quod de consensu vnanimi atque uoto dilectj Mariti mei Chunradi predicti atque Liberorum nostrorum omnium vineam quandam dictam Rayder in superiori Liuben sitam ad me iure hereditario pertinentem ob nostrarum ac progenitorum nostrorum remedium animarum Ecclesie sancti Floriani super Anasum Patauiensis Dyocesis tradidi liberaliter ac legaui eandemque vineam domino ... de Pernawe Canonico et procuratori predicte Ecclesie loco et nomine sui Conuentus et prepositi personali presencia resignaui, ipsam quoque uineam ad tempora uite mee a prefato domino ... de Pernawe suscepi protinus et resumpsi tali conditione interposita et annexa, quod predicto domino ... preposito nec non dominis Canonicis floriacensis Ecclesie in Signum possessionis vinee prelibate, a qua, quoad uixero, nisi de voluntate mea processerit, excludi non debeo ullo modo, vnam libram denariorum vsualis monete in festo beati Martini teneor annis singulis sine negligencia ministrare. Post obitum autem meum antedicta vinea cessante seruicio suprascripto indilate ad vsus legitimos dominorum memorate Ecclesie vacabit ac libere deuoluetur. Prenotati etiam domini anniuersarium diem mariti mei predicti annis singulis atque meum secundum Ordinis consuetudinem Missarum celebrationibus aliisque debitis exequiarum officiis, prout nos ipsorum sancte fraternitati deuote ac fideliter recommisimus, peragere non omittent. Et ut omnia supra scripta Robur perpetue obtineant firmitatis, presentem literam per appensionem Sigilli Mariti mei prefati diligencius conmunitam sepedictis dominis preposito videlicet et Canonicis floriacensis Ecclesie voluntarie tribui et donaui in premissorum omnium euidens testimonium et cautelam cum Testibus infra scriptis, qui sunt: Jrnfridus judex in ybsa, Andreas Gener domini Gotschalci, Fridericus sartor, Otto apud Portam, Perhtoldus weinmaister, wigmannus, Ditmarus Cho^el, Livpoldus Schoerer, Rudlinus weiglini, Rugerus villicus ciues ybsenses, Heinricus Regenspurger, Chvnradus et vlricus dicti Dv^erstones, Syboto Moegel ciues in Stein et alii quam plures fide digni. Datum in ybsa Anno domini Millesimo Trecentesimo Quinto jn festo beati Luce Ewangeliste.

Source Fulltext: OÖUB 4 (Wien 1867) S. 494-495, Nr. 530