Ich Wolfhart Mvlbanger genant vnd mein havsvrov Christein vergehen vnd tvenn chvnt mit vrchvnd des gegenwrtigen priefs allen levten, di in lesent oder horent lesen, di nv lebent oder her nach chvmftigen werdent, daz Chvnrat der Lavwoer vnser vrevnt allen den chrieg vnd daz recht, daz wir an dem hof datz Otnvsch haben gehabt, geledigt hat vnd an sich pracht also, daz wir fvrwaz dehainen chrieg noch ansprach dar nach haben schvllen vnd daz er nach sel vnd nach leib allen seinen frvm da mit schaffen schol mit verchavffen, mit versetzen, mit verwechseln oder ze einem selgraet ze geben vnd swie im gevelt, schol er damit wandeln vnd ist daz geschehen mit vnser gvnst vnd verdachtem mvet vnd aller vnser erben gvetem wiln vnd mit rechter schidvng vnser erwern vrevnt des alten Gotfrids von talhaim vnd Levdols von travnchirchen vnd avch mit der fvdrvng vnd hilf hern fridreichs des Lavwer chorhern datz sand Florianshavs. Daz di wandlvng vnd di red staet vnd vnverchert vnd an chrieg beleib ewichleich, dar vber geb wir disen prief ze einem vrchvnd versigelten vnd bestaeten mit vnsers vrevnts Insigel vlreichs von Lav, wand wir nicht jnsigel haben. Der red vnd wandlvng sind gezevg Gotfrid von talhaim vnd sein svn vlreich, Gotfrid, Levtold, Dietrich vnd Levtold von travnchirhen vnd sein svn Ortolf vnd Mathe von Rvelshaim vnd vlreich von Lav vnd thomas, Mathe vnd ander piderb laevt genveg, den di wandlvng chvnt ist. Der prief ist geben, dv von Christi gepurd vergangen warn drevtzehen hvndert iar vnd dar nach in dem ainleftem iar an sand Jacobs tag.

Source Fulltext: OÖUB 5 (Wien 1868) S. 59-60, Nr. 57