Ich Ortolf hern Lewen svn von Warperg vnd ich Margret des vorgenanten Ortolfs havsvrowe wir veriehen vnd tv^en chvnt allen den, die disen prief sehent vnd horent lesen, daz wier mit veraintem mv°t vnd mit gvtem willen aller vnser Erben vnd mit vrevnt rat Fridreichen dem Hager vnd Dietrihen seinem pruder vnd ier paider erben ||
gesetzet haben die zwo Hv°b datz Toenne, die da haizzet der of Hvb die vnser aygen waren, vu^er sehzich pfvnt pfenninge wienner Mvnzze mit allem dem reht vnd mit aller der stet, als man satzung setzen sol, also mit der beschaidenheit, swelich vnser Erben daz vorgenant gv^et haben wil vnd dar nach spriht, der sol Fridreichen dem hager oder sinem pruder Dietrihen oder irn erben geben die vergenanten sehzich pfvnt pfenning an allen chrieg, da fv^er iz ier satz ist von vns. Daz Fridrich vnd Dietrichen vnd iern erben die red stet vnd vnzebrochen also beleib, dar vber gebe wir in diesen prief zv einem sihtigen vrchvnde vnd zv einer stetichait versigelten mit hern Jansen jnsigel von Chappell und mit Heinriches jnsigel von volchenstorf vnd mit vnser selber jnsigel vnd mit den gezevgen, di hie genant sint: Her Heinrich von volchenstorf der junge, Meinhart der Sincenperger, Ortolf der Sincenperger, Chunrat der Sincenberger, wilhalm, wolfhart, Fridreich vnd Marchart die Chersperger vnd ander erber levt. Der prief ist gegeben, do von vnsers herren gepvrd sint gewesen drevzehen hvndert iar vnd darnach in dem drevzehenten iar an sand Mathyas tach ze vaschang.

Source Fulltext: OÖUB 5 (Wien 1868) S. 102-103, Nr. 99