Ich Durinch van Aeygelsperge Vnd ich Mechthitt min Hausvrowe Vnd vnser peder Erben, die hie genant sint, Peters vnd Margret vnd Elspet vnd ander vnser Erben, Die wir noch chu^emfetlich gewinne, wir vergehen vnd tv^en chunt allen den, di nv° sind vnd hernach chu^emfetich werdent, Die diesen Prief sehent Oder ho^erent lesen, Daz wir mit wolbetachedem mv°et Vnd nach vnser pesten freunt rat Mit rehter schidunge sind geschaiden van dem ho°fe datze zyertnaren, da Hainrich der Aeygelsperger ê was auf gesezzen, Mit so au°z genomer red ist deiv schidunge verschaiden mit rehter fu°rziht, Daz der vorgenant ho^efe van mir vnd van min Erben, deiv vorgenant sint o^eder noch chumfetichlich gewinne, schol var vns beleiben hine für ewichlich an alle ansprach. Daz deiv red stet vnd vnverchert beleibe, als voruerschriben ist, Dar vber gib ich Durinch van Jeygelsperge vnd min Erben deiv vorgenant sint, disen Prief zv aeim o^efen verchunde versigelden mit mins heren anhangunden jnsigel hern Hainrichs van Walsse, Der zsten zeiden ist gewesen obrister Lantricheter in der Ryedmarich, Vnd mit hern Marichehartze anhangunden jnsigel van Oede, der zsten zeiden ist gewesen foite an mins herren stat van Chunringe vber den vorgenanten ho^efe. Der sache ist gezeuge, als voruerschriben ist, Her Hainrich der Pyber, her Albreht der Wolfestain, her wernher der schreiber, Her Symon der pharrer van Ryed, Her Hainrich van Sweinpach, Dietmare de wolfestain, Albreht der Stadler, Walchuen der zeller, Otte au^ez der Trefeniche vnd ander piderber lewt genu°ege. Der prief ist geben datz sand Florian, do van vnsers herren Christus gepurde ergangen waren Tausent jar, dreiv hundert Jar, darnach in dem aeins vnd zwaingisten Jar, des freytags in den fier tagen in der fasten.

Source Fulltext: OÖUB 5 (Wien 1868) S. 284, Nr. 294