Ich Gvndacher vnd ich Rv°ger Prv^eder von Starhenberch, veriehen offenleichen vnd tu°n chvnt mit disem Gegenbv°rtigem Brief allen den, die in lesent oder horent lesen, die nv sind oder hernach chv^enftich werdent, daz wir mit verdahten mvt vnd mit willen aller vnser Erben ze der zeit, do wir ez wol getun mohten, als wir ê lang vor vielen jaren willen vnd fv^ersatz haben gehabt, den ersamen Herren vnd dem Gotshaus datz sand florian gegeben haben ledich1eichen vnd freileichen mit aller staet, die aigenschaft vnd alls daz reht, daz wir vnd vnser Prvder Jans, von dem ich Gvndacher der vorgenant vmb mein gu°t gechaufft vnd gelo^eset han sein tail an dem Hof datz Obernlarch, den Alram der Slag Purger ze Ense vnd sein Hausfrawe Agnes von vns ze lehen habent vntz an ir baider tode, den si von den Wolfstainn weilen gechauft habent. Vnd wan nach ir baider tode niem ander mer chain reht nach Lantzrecht dar an hat, schvllen di vor genanten Herren vnd datz Chloster datz sand florian den selben Hof ewichleichen inne haben mit alle daz dar zu° geho^ert versu^echt vnd vnuersucht vnd mit allem nvtz ledichleich vnd freileichen in rehter aigens gewer zu einem selgeraet vns vnd allen vnsern vodern vnd nachchomen, Vnd sein auch des selben Hofs des vorgenanten Gotshaus scherm vnd gewer als reht ist in dem Land ze O^estereich vnd ob der Ense, vnd daz dem ê genanten Gotshaus vmb den oft genanten Hof von vns oder von ander iem fv°rbaz immer chain chrieg oder ansprach icht auf ste, dar v^eber geb wir in disen Brief ze ainem sihtigen vrchv^end versigelt vnd bewart mit vnsern jnsigel mit den zevgen, di hie benant sint vro Elspet kern Hainreiches Hausfrawe von Walse, Peter von Lobenstein, her Chvnrat von Hvmoltzried, Hainrich der Lozberger, fridreich der Tanpech, Perhtold Schefolt, Rvger der Mauter ze Ense vnd ander biderb Levt, den ez chvnt vnd gewizzen ist. Der Brief ist gegeben in dem vorgenanten Gotshaus an sand Aitten tag, nach Gotsgebvrt v^eber drevzehen Hvndert jar, dar nach in dem drev vnd zwaintzgisten jar.

Source Fulltext: OÖUB 5 (Wien 1868) S. 341-342, Nr. 351