Multa, que presencialiter geruntur negotia, tolleret obliuio vel etiam instantiarum dirimeret fortitudo, si eadem literarum et testium non reciperent fulcimentum. Proinde nos Wernherus miseratione diuina Prepositus, Nycolaus Decanus totusque Domus sancti floriani Conuentus Notum facimus vniuersis presentem Paginam inspecturis, quod honesti viri Dietricus et Rvgerus fratres cognominati Wolfstain amici nostre Ecclesie speciales Quatuor Predia Alberti Concanonici nostri ipsorum germani inducti consilio in animarum suarum perpetuum remedium nostro Monasterio donauerunt vnam Hubam videlicet, que dieitur Arbaithub in festo sancti Georii duodecim solidos denariorum soluentem, Pheodum quoddam dictum datz den Planchen soluens Quatuor schaffia siliginis, Pheodum quoque auf dem Slatt soluens in Natiuitate beate virginis Sex solidos nec non Pheodum circa Nevnhofen in dem Zeyleich soluens in Natiuitate beate virginis vnam libram; de quibus bonis tale sibi fieri apud nos remedium statuerunt, vt videlicet singulis diebus perpetuo in Vesperis et in Matutinis beate virginis Antiphona: Veni sancte, cum Collecta: deus qui corda fidelium, a nobis omnibus generaliter et specialiter deuote dicatur et inpretermisse et inuiolabiliter obseruetur. Duodecim quoque solidi denariorum proinde in festo Pentecosten inter nos annis singulis diuidantur. In anniuersario etiam predictorum, qui Apostolorum Symonis et Jude vigiliam occupabit, quatuor Schaffia siliginis in Panes redacta et due Berne carnium sex valentes solidos inter Pauperes diuidantur vnamque libram denariorum Conuentus noster percipiat iterato, vt ad missas et vigilias et propitiationes ipsis quaslibet simus perpetuo obligati. Infirmarius quoque noster, qui pro tempore fuerit, Predia reget predicta et fideliter prescripta quelibet procurabit minutaque seruitia a dictis bonis prouenientia pro labore suis vsibus reseruabit. Profitemur etiam, quod si per negligentiam nostram inpedimento legitimo non obstante ordinatio prefata fuerit pretermissa et ad trinam monitionem Heredum vel consanguineorum ipsorum non fuerit emendata, senior de Heredibus vel alter de linea germinis ipsorum omnes prenotatos redditus de nostra permissione voluntaria in suam recipiat potestatem eosdem tanto tempore possidendo, quousque talis negligentia plenarie fuerit reuocata. Facta autem emendatione Heredum vel consanguineorum suorum ille, qui se pretextu talis negligentie de ipsis possessionibus intromiserat, nichil habebit vlterius disponere cum eisdem, quod si forte ad restitutionem eorundem se difficilem redderet Prediorum, super rehabitione ipsorum aduocati nostri auxilium tenebimur inuocare. Nos igitur pie donationi dictorum Ditrici et Rv^egeri, a quorum etiam predecessoribus multa percepimus beneficia, gratam vicissitudinem rependere cupientes elargita nobis in Jus perpetuum bona huiusmodi recipientes ab ipsis ad omnia et singula supradicta fideliter et perpetuo ad implenda nos et successores nostros asstringimus et firmiter obligamus. In cuius rei testimonium presentes dedimus literas sigillorum nostrorum robore conmunitas. Datum in Ecclesia nostra predicta, Anno domini Millesimo, ccc°, Vicesimo quarto Tyburtii et Valeriani martirum iesu christi.

Source Fulltext: OÖUB 5 (Wien 1868) S. 383-384, Nr. 388