Ich Hainrich der Tamprvkker ze Ybs vergich offenlich vnd tven chvnt mit v^erchv^end ditz gegenwa^ertigen briefs allen den, di in lesent oder horent lesen, di nv sint oder hernach chvmftig werent, daz jch vnd mein vodern gehabt haben ainen weinzehent in der wachave auf su^emlichen weingarten datz Ritzling vnd da bei, vnd aller zehent der dar vmb leit vor vnd hinden vnd dar neben vber al in der wachave von Mo^estnichtzch vntz an den watstain ist der ersamen Herren vnd der Gotshavser ze sand Po^elten vnd ze sand Florian vnd sint da mit begnad von dem Pistvm von Pazzawe, dar vber si gvet hantvest habent, vnd dar vmb, daz in da selb nicht mer auzzers vnd vro^emdes was dann daz mein, ward mein vater wernher weillen, dem Got genad, von den vorgenanten herren an gesprochen vmb denselben zehent, also er gehert in iren zehent vnd wer dar auz geprochen vnd enphro^empt. Da wert vnd schermt vnd rett sich mein vater dar mit, daz er sein iach ze lehen von ander herschaft dann von Pazzave. Nv sint zv mir chomen di ersamen herren Probst Heinrich von sand Po^elten vnd Probst wernher von sand Florian vnd habent mich des beweist vnd ermont, daz ich den vorgenanten zehent nicht gewerlich besezzen han, won er auch lehen ist von dem Pistvm ze Pazzave vnd ze recht geho^ert in andern iren zehent vnd han mein gewizzen an gesehen mir vnd allen meinen vodern vnd nachomen ze einem ewigen selgerêt vnd han mit gveten willen meiner Havsvroven vro Osann vnd mit gvnst vnd rat aller meiner vrevnt den vorgenanten herren vnd ir Gotsha^eusern ze chauffen gegeben vmb vier vnd sibentzk phvnt phenningr vnd zwai phvnt meiner havsvroven ze leitchauf, der ich aller schon verricht vnd gewert pin, allez daz recht vnd den nutz gantz vnd gar, daz ich vnd alle mein erben gehabt haben versvecht vnd vnuersvecht an dem vorgenanten zehent vnd pin auch des ir scherm vnd gewer vuer all ansprach. Wer auer, daz in vuerbaz chain chrieg oder widrung von iemman dar vmb auf stvend, swaz si des schaden nêmen, des schvllen si mit meinen vnd meiner vriunt gvetlichen willen völchlich zv chomen vnd haben auf alle, daz ich in dem land ze Osterich han, vnd daz di wandlung stet vnd vnzebrochen beleib, gib ich in disen brief ze ainem sichtigen vrchv^end bewart vnd versigelt mit meinem jnsigel vnd ze pezzerr bestetigvng vnd zivg mit hern Ekkhartes meins vetern vnd hern Hagen von Spilwerch jnsigel gevestent. Dirr Red vnd wandlung sind zivg her Heinrich von Vidorf, friderich sein brueder, Otacher der Tamprvkker, Symon vnd Dyetrich Richter ze Ybs, Peter weigel, Leopold zentzel, Reicher purger da selbel (sic) vnd ander biderb levt genveg, den iz chvnt vnd gewizzen ist. Dis wandlung ist geschehen datz ybs, do von Christes gewurb (sic) vergangen waren drevzehen hvndert jar, dar nach in dem drevndzwantzisten jar an sand Lvcein tag.

Source Fulltext: OÖUB 5 (Wien 1868) S. 371-373, Nr. 376