Wier Wernher von Gotes gnaden Probst ze sand florians haus tun ze wizzen vnd offen an disem brief, daz ein has vnd ein chrieg long gewesen ist zwischen dietreichen dem Gusterperger vnd seinen freunten ze ainem tail vnd seinem Geswein seiner hausfrawen pru^eder vnd ierr Erben vnd freunten an dem andern .tail, di Rechtes iahen an der selben Hu°b auf dem Gusterperg vnd an ainem zehent datz Linteich, swie daz wa^er, daz si e mit anderm eribtail hin dan getailet wa^ern . dez selben hazze vnd dez chrieges vmb deu hu^eb vnd zehent vnd vmb alle sache darumb, daz icht mer Schadens vnder in ergieng, satzten si sich nach vnserm vnd andrer erba^err lau^et Rat gantzleichen vnd lauterleichen an vier man ierer freunt vnd ierer nachtpawern, Daz ist Hainreich an dem aigen, Chu^enrat der Gru^eber, Gebhart der Trawner vnd der weinzu^erl vnd namen vns v^eber die vier ze ainem v^ebermann. Der selben chrieg vnd haz wart mit gu^eter betrachtung vnd nach rat erba^err laut gantzleich verricht vnd verschaiden Also, daz der Gusterperger bey der hu^eb vnd bey dem zehent geru°t beleiben scholt an allen chriege vnd ledichleichen immer mer inne haben scholt ze versetzzen vnd ze verchauffen, allen seinen frum do mit schaffen also, daz si ansprache dar auf nimmermer darauf (sic) gehaben scho^elten. Vnd dar vmb vnd da wider wart geschaiden zwain to^echterlein, di sein hausfraw bey ier ersten wiert gehabt hat Chu^enigunden vnd Elspeten vier vnd zwaintzig phunt phenning, die schol in der Gusterperger ier Steufvater geben auf den vaschang, der nu^e schierst chu^emt vnd schol seu auch auf denselben tag in seiner chost haben vnd schol seu dann mit phenning all in ier nachster freunt gewalt antwu^erten, daz si di betrewen schu^ellen, als si in dez schuldig sind. Darzu^e hat der selb Gusterperger seinen Geswein Chu^enraten vnd Seyfriden vnd Chu^enraten dem Roten chnecht vnd Ortolfen pru^edern vnd seiner swiger vnd den nachsten erben gegeben zehen pfunt, der schu^ellen dem selben roten chnecht geuallen sechs phunt vnd seiner Swiger ains, Otten dem Mesner ains, den (deu) andern zwai phunt scholt man tailen nach vnserm Rat vnder di nachsten Erben darnach vnd ein tail den schiedlau^eten. Vnd daz di su°n vnd die schiedung also sta^et ewichleich beleib, dar vber habent vnuerschaidenleich gelobtt Ott der Mesner, Seyfrid vnd Chunrat, Chu^enrat der Gru^eber, der Hau^ebler vnd sein Pru^eder ... der Liechtenperger, Ru^eger von Oberndorf mit seinen zwain su^en fu^er alle freunt vnd Erben an alles geua^er vnd sunderleich für Chu^enraten den Roten chnecht vnd für Oettlein seinen pru^eder, di sich ga^entzleich verzigen habent vnd in vnser hant gegeben alles daz recht, daz si habent gehabtt an dem vorgenanten Gu^et also, (ob) di su^en vnd vmb alle ansprach immermer v^eber varen wu^erd, des Got nicht geb, von dem Roten chnecht oder von seinen pru^edem oder von andern erben, so schu^ellen di vorgenanten Ott der Mesner Vnd die andern vns veruallen sein ye der man dreizzig phunt phenning oder aller seiner hab. War aber, daz indert ainer wa^er vnder den Erben, der in nicht gehorsam der taiding wolt sein, so schu^ellen di vorgenanten, di vmb di su^en gelobt habent, dem Gusterperger zu legen an dem Recht vnd an allen dingen gegen denselben. Daz habent si gelobtt all gemain mit irn trewen. Iz ist auch also geschaiden, ob Dietreich der Gusterperger der vorgenant nicht enwa^er, so schullen sich sein freunt vnder winden seiner Tochter Margreten, die er hat bey seiner erern hausfrawen vnd schullen di vertrewen vnd inne haben, als si ier des schuldig sind. Daz diseu ebenung vnd daz gelu^eb, als vor beschaiden ist, von in paidenthalben sta^et vnd vnuerchert beleib, dar vber geb wier nach ierr gepet dem vorgenanten Gusterperger disen brief ze v^erchu^end besta^ett mit vnserm Insigel. Der brief ist geben in vnserm Gotshaus, do von Christes gepu^erd vergangen waren Dreutzehenhundert jar, darnach in dem vier vnd zwaintzkistem jar an sand Georij tag.

Source Fulltext: OÖUB 5 (Wien 1868) S. 385-387, Nr. 390