Wir Wernher von gotes genaden Probst vnd ich Nycla Techent vnd alle die Samnvng des Gotshavs datz sant Florian vergehen offenlich an disen prief allen den, die in sehent oder ho^erent lesen daz wir mit verdahtem mu^et vnd mit rat gemainchlich vnser guet, daz wir vnd vnser Gotshavs datz Grieking haben gehabt mit allem dem reht, daz dar zv^e geho^eret ze Holtz vnd ze Velde, gepavn vnd vngepavn, versu^eht vnd vnversu^eht mit allem nutz, swi wir ez gehabt haben, dem Erbern mann Vlrichen dem Geltinger vnd seiner Havsfrowen, fravn Margreten vnd allen seinen Erben ze wider wechsel vmb ein gvet datz Praitenaich vnd vmb einen Akker dar zv^e, da man aht Hvener von dient, daz er vns vnd vnserm Gotshavs gegeben hat wider daz vorgenant gvet datz Grieking an allen chrieg vnd ledichlich. Daz der widerwechsel vnd dev wandelvng von vns vnd von vnserm Gotshavs, als vor geschriben ist, stet beleib vnd vnvercheret, dar v^eber geb wir disen prief bestetiget mit vnserm jnsigel vnd mit vnsers Convents jnsigel ze einem sichtigen vrchv^ende dem êgenanten Vlrichen vnd allen seinen Erben mit den zevgen, die hie benennet sint, her Rvdolf der Schiver, her Sighart von Grveb, her Espein von Hag, Otakher der fu^erter, Rvdolf der Schiver, Levtolt von Chirchperch vnd ander biderb levt, den dev vor geschriben wandelvng wol chvnt vnd gewizzen ist. Der prief ist gegeben, do von Christes gepu^ert ergangen waren Drevzehenhvndert jar, dar nach in dem sehs vnd zwainzisten jar an vnser frawn tag ze der Dienst zeit.

Source Fulltext: OÖUB 5 (Wien 1868) S. 456, Nr. 458