Ich Hainreich von Volchenstorf vergich vnd tvn ze wizzen allen den, die disen prief ansehent oder ho^erent lesen, die nv lebent vnd her nach chv^enftig sint, daz ich mit verdachtem mu^et vnd mit meins Pru^eder hern Seijbotz gutem willen vnd gunst verchauft vnd ze chauffen gegeben han ze der zeit, do ich ez wol getvn mocht vnd an allen chind waz, den Ersamen Herren hern Wernhern Probst ze den zeiten vnd der Samnung des Gotshaus datz sant Florian vmb Sibentzich pfunt Wiennêr pfenning, der ich gêntzleich gewert pin, meinen Hof, der da haizzet der Arnoltz hof in der pfarr ze Hofchirchen mit alle dem nutz, der da zv geho^ert, besucht vnd vnbesucht mit Holtz, mit Wayd, mit Wismad vnd swie ez genant ist, der mir ledich warden ist von Chvnraden des Waltpoten Tod, der in allain von mir ze lehen het, vnd mein vreies aygen ist, vnd han in den gegeben ledichleieh vnd vreileich mit allem dem recht vnd ich in gehabt han, Ewichleich vnd vreileich ze besitzen, verchauffen, versetzen vnd allen ir frum da mit ze schaffen. Vnd verzeich mich sein gêntzleich also, daz ich vnd alle mein Erben ansprach dar auf nimmermer gehaben schu^ellen, vnd setz mich dar vber dem vorgenanten Probst vnd der Samnung des vor genanten Gotshavs ze scherm vnd ze gewern fu^er alle ansprach, als aygens recht ist in dem land ze O^esterreich vnd ob der Ens, vnd besvnder meinen Hof, der da haizzet Teinprunn mit alle dem vnd dar zv geho^ert vnd auch mein vreis aigen ist vnd vnuerchumert ze rechter ebentiwr fu^er den vorgenanten hof also, ob si von ansprach oder von recht dar an icht schaden nêmen, daz si daz gêntzleich haben schu^ellen auf dem selben meinem hof. Daz diser Chauf vnd ditz gelu^eb, als vor beschaiden ist, von mir vnd meinen Erben stêt ewichleich vnd vnuerchert beleib, dar v^eber gib ich den vorgenanten Herren vnd dem Gotshaus disen prief ze vrchu^end, beuestent vnd bestêtigt mit meinen jnsigel. Ich Seybot von Volchenstorf vergich auch vnd offen an disem prief, daz ich an dem vorgenanten Hof, der der Arnoltz Hof haizzet, aller recht ains nicht han vnd mir mein tail an anderm gu^et da wider von meinen pruder Hainreichen gêntzleich warden ist. Vnd gib dar v^eber ze Vrchu^end mein jnsigel an disen prief. Dar zv han ich gepeten meinen Vetern hern Albern von Volchenstorf vnd hern Eberharten von Walsse ir Vogt, ze den zeiten Lantrichter ob der Ens, daz die ir jnsigel ze gezevg dar an gehangen habent. Dirre sache sint gezevg her Jans von Chappell, her Vlreich von Gru^ennburch, her Hertneit von Trawn, her Gvndacher vnd her Perchtolt von Lo^esenstein, Ru^eger vnd Gvndacher von Storchenberch Vnd ander Erbêr laut genu^eg. Der prief ist gegelten nach Gotes geburt v^eber Dreutzehenhvndert jar, dar nach in dem Sechs vnd zwaintzkisten jar, an sant Nyclas tag.

Source Fulltext: OÖUB 5 (Wien 1868) S. 461-462, Nr. 464