Ich Otte der verber Purger datz Ens vnd ich Mehthilt sein Housfrowe veriehen vnd tun ze wizzen allen den, di disen brief ansehnt oder heornt lesn, daz wir von vnserm gueten vriunde Ortolfen dem vragner ouch Purger datz Ens geworben vnd gechouft haben drey zehnt, daz ist der zehnt datz Obern Larich, der zehnt datz Okijr ovf einem hof vnd ouf zwayn lehn vnd der zehnt da pei Neunchirchn ouf dem hof, da weiln her Meinhart von Sintzenperig ouf saz, di vns vnd vnsern erben, di wir mit ein ander haben vnd noch gewinnen mugen von dem ersamen wernhern ze den ziten probst datz sant florianshous gelihn sint vnd vor dem di wandelung geschehn ist also, daz wir, daz wir (sic) vnd vnser paider erben von den selben zehnten gebn suln dem vorgenanten probst vnd seinen nachchomen alle iar an sand Georin tag zynses vierzehn wienner pfennig an alle widerred; wêr aber, daz wir oder vnser paider erben der vorgenanten pfenning an dem vorgenanten tag niht geben, oder ob wir paidev mit ein ander an erben verschaiden, so suln di vorgenanten zehnt daz vorgenante Gotshous datz sant florian an allen chriech ledichlich wider an geuallen, vnd daz dise red, als vor beschaiden ist, von vns vnd von vnser paider erben stet vnd vnuerchert beleib, daruber gebn wir dem vorgenanten probst vnd dem Gotshous datz sant florianshous disen brief ze vrchunde bestetigt mit mein Otten jnsigel vnd durch bezzer sicherhait haben wir gepeten hern Chu°nrat ze den ziten Richter vnd Schaffer der erbern herren von walsse datz ens, daz er ze Gezivg sein jnsigil daran gehangen hat. Der brief ist gegebn an sant Marien Magdalen tag nach gots gepurt vber drivtzehn hundert jar, darnach jn dem siben vnd zwaintzkisten iar.

Source Fulltext: OÖUB 5 (Wien 1868) S. 489, Nr. 491