Wjr Wernher von Gotes verhengnu°zze Probst des Gotshaus datz sand Florian veriehen vnd tu^en chunt allen den, di disen brief an sehent oder ho^ernt lesen, die nu lebent vnd hernach chunftig sint, daz wier daz gu^et, daz da haizzet auf dem Chaltenperig, daz da weilent von vns het Pilgreiˆm des Solsneijder mit allem dem, daz dar zu^e geho^ert, gelihen haben dem beschaiden manne Vlreichem Maulharten Purger ze Ens vnd seiner hausfrawen vrawn Margreten vnd ier paider chinder, die si mit einander habent oder noch gewinnent also, daz si demselben vnserm Gotshaws davon rechtes Zinses alle iar an sand Go^ergen tag geben schu^ellen an widerred dreizzig wienner phenning. Vnd ist, daz si der nicht gebent, so schu^ellen darauf ze drein viertzehen tagen ze wandel gen dreizzig phenning, daz wu^erd mit dem rechten zins ein halbphunt wienner phenning, vnd wa^er, daz er oder sein hausfraw vnd ier paider chind vnd erben, die daz Gu°t dann inne habent, daz selb halb phunt nicht ga^eben vor dem nachsten sand Go^ergen tag, der darnach chu^enftig ist, so schu^ellen si geuallen sein von allem ierm recht, daz si habent gchabtt an dem vorgenanten gu^et vnd schol an daz vorgenant Gotshaus an allen chrieg wider geuallen. Daz diseu rede v^eber daz obgenant lehen, als vor beschaiden ist, von vns vnd auch von in sta^et vnd vnuerchert beleib, dar vber geben wier dem vorgenanten Vlreichen dem Maulhart, seiner hausfrawn der vorgenanten Margreten vnd ier paiden chinden disen brief ze v^erchu^ende besta^etigt mit vnserm Insigel. Dierr sach sint zeug vnser pru^eder her Andre ze den zeiten Chelner, her albrecht wolfstain ze den zeiten Spitaler vnser diener Dietmar wolfstain, Hainreich Hierttel, Chalnberger Purger von Ens Chunrat Sperrenpautel, Fridreich der Chelner, Ludweig vnd ander lau^et genug. Der brief ist geben in vnserm Haus an vnserm Chirichweichtag Nach Christi gepu^erd vber dreutzehen hundert iar darnach in dem Siben vnd zwaintzkistem iar.

Source Fulltext: OÖUB 5 (Wien 1868) S. 490, Nr. 492