Albertus dei gracia Ecclesie Patauiensis Episcopus Venerabilibus in christo fratribus Abbatibus ac honorabilibus et discretis viris vniuersis et singulis Prepositis, Archydiaconis, Decanis, Prioribus, Plebanis, Ecclesiarum vel Capellarum Rectoribus seu vices eorum gerentibus per Dyocesim nostram constitutis Salutem et Affectus in domino salutares. Cum summa sit racio, que pro religione facit, digne actus illos benigno fauore prosequimur, per quos deo sub regulari obseruancia famulancium penuria releuatur, cultus diuini augmentum procuratur et fidelium deuocio ad pietatis opera propensius incitatur. Sane cum Monasterium, Canonicorum Regularium sancti floriani ordinis beati Augustini nostre Dyocesis propter sumptuosa edificia, que ibidem pro tempore incumbebant et adhuc in presenciarum incumbunt facienda ac inportabiles hospitalitates illic crebro et inportune occurrentes nec non varios alios euentus sinistros, qui in bonis et districtibus suis ceteris dampnabilius succreuerunt, graui sarcina debitorum sit oppressum, de qua absque subuencione non poterit exonerari, ne ex hoc cultus diuinus inibi seruari consuetus minuatur, cum spiritualia sine temporalibus diu non possint subsistere, nos eorum defectibus pii patris more condolentes peticionem generalem per totam nostram Dyocesim ipsis pro huius suis penuriis releuandis prouida deliberacione prehabita duximus indulgendam, Omnibus vere penitentibus et confessis, qui karitatiuo eis seu elemosinari subuenerint auxilio xl dies indulgenciarum de iniuncta eis penitencia confisi de misericordia altissimi et apostolorum eius Petri et Pauli in domino relaxantes. Qua propter deuocionem vestram in christo salubriter exhortamur nichilominus vobis vniuersis et singulis in remissionem peccatorum vestrorum iniungentes ac in virtute sancte obediencie districcius precipiendo mandantes, quatenus necessitatibus dicti Monasterii et personarum inibi altissimo famulancium, humanitatis studio conpacientes negocium eorum post receptionem presencium per uos ipsos et commissarios vestros in confessionibus, testamentis et aliis actibus congruis publice et occulte cum omni fidelitate et efficacia curetis promouere ac in prima Dominica Aduentus domini proxime affuturi iniciantes singulis diebus Dominicis et festiuis in sermonibus seu predicacionibus publicis nec non alias vbilibet in congregacionibus conmunibus, vbicunque fidelium multitudo populosius conuenerit, salubribus exhortacionibus et monitis plebem vobis subiectam ad prefata elemosinaria Monasterio et personis, quanto hylarius et munerosius poterunt inpendenda vti diligencius et curiosius volueritis, inducere et allicere studeatis. Indulgentias etiam eis a Romanis Pontificibus, Cardinalibus, Legatis, Archyepiscopis et Episcopis seu aliis auctoritatem habentibus concessas, quos (sic) eciam nos gratas et ratas habentes quo ad tempus infra limitatum, quantum de iure efficacius possumus, auctoritate ordinaria confirmamus iuxta Cartarum suarum, quos vobis exhibebunt, continentias sollempniter et explicite publicantes Statuentes nichilominus singuli in singulis Ecclesiis vestris vnam vel plures personas ydoneas et expeditas, que inter cateruas ||
populorum hinc inde peditantes oblaciones seu elemosinas pro huius negocio petant et colligant ac locorum pastoribus seu vices eorum gerentibus fideliter representent per ipsos vlterius ad loca a prefatorum Canonicorum Regularium nunciis eis assignanda cum omni fidelitate et diligencia diebus prefixis destinandas. Vobis vero Archydiaconis seu Decanis predietis sub obtestacionibus antedictis specialiter damus in mandatis, quatenus post receptionem presencium indilate scripta vestra et mandata ad singulos vestros subditos, vbi expediens fuerit, super presentis negocii execucione fideliter et diligenter ab ipsis facienda dirigatis Omnes et singulos questuarios interim conquiescere facientes. Ceterum vt in execucione premissorum omnes et singuli magis feruentes et seduli efficiamini, permittimus, vt quodquod (sic) vestrum vltra diuine retribucionis expectacionem pro sollicitudine vestra temporali emolimento desideratis consolari, quartam partem obuencionum huiusmodi pro vsibus propriis licite retinere valeatis Sub diro tamen examine extremi iudicii districcius inhibentes, ne ad amplius laxare manus audeatis. Presentibus post festum Purificacionis nouissime affuturum minime valituris. Datum in Ebelsperch, sub Sigillo nostro Anno domini M°. CCC°. xx septimo, Cholomanni martiris.

Source Fulltext: OÖUB 5 (Wien 1868) S. 494-496, Nr. 497