Nos Wernherus diuina miseracione Domus sancti floriani Prepositus publice profitentes notum esse volumus presencium inspectoribus vniuersis, quod, cum Capella sancti Stephani Prothomartyris in Rorbach et capella beati Laurencii in Chvrtzenchirhen Ecclesie nostre annexe, licet ante multa tempora consecrate, vtrum ex negligencia vel redditibus distractis ignorantes, carerent lumine nocturnali; ad defectus hujusmodi emendacionem sollicite cogitando, Prediolum quoddam, situm in Grvennprvnne, quod vir Honestus Engelbertus dictus Hyertel a nobis et Ecclesia tenebat in feodum, cum omni jure, quod sibi in eo conpetebat, libere et absolute pro Quindecim talentis denariorum veterum Wiennensium conparauimus ab eodem, dicti predii sev feodi censum siue stevram siue enxenia in vnam Summam vnius talenti, videlicet seruicium duximus redigendum Jta vt, cum in Natiuitate beate virginis dimidium talentum nouorum et in Natiuitate domini dimidium talentum veterum Colonus annis singulis dederit, excepta sola institutione et iure mortuario, ab omni exaccione penitus sit exemptus, Deputantes et donantes dictum seruicium vnum talentum denariorum videlicet de consilio et consensu Tocius Conuentus ad instauracionem et emendacionem dictorum luminum ob reuerenciam dictorum Martyrum in dictis duabus Capellis de Camera Prelati per manus sui Procuratoris in statutis predictis festiuitatibus perpetuo ministrandum, verbum sapientis habentes pre oculis, quod lux iustorum letificabit, lucerna vero jnpii extingwetur.||
||
Et vt hec donacio pia et necessaria, vt predictum est, a nostris successoribus perpetuo debeat et firmiter obseruari, presentes conscribi litteras fecimus in testimonium euidens, nostri ac Conuentus sigillorum munimine roborari. Siquis vero successorum, quod absit, negligens in dicta donacione vel remissus fuerit, caueat et timeat, vt eterno lumine non priuetur. Datum in Domo nostra predicta jn die Beati Stephani Prothomartyris, Anno domini Millesimo CCC°. XXX°.

Source Fulltext: OÖUB 5 (Wien 1868) S. 592-593, Nr. 591