Wier Hainreich Probst von Gotesgnaden, Fridreich Techent vnd all die sammung des Gotshaus datz sand Florian veriehen vnd tu^en chunt allen den, di disen brief sehent oder ho^ernt lesen, di nu lebent oder hernach chu^enftig werdent, daz weilent walther der Reichelsperger gehabt hat von vns vnd von vnserm Gotshaus einen Hof datz Reichelsperg, da er vns von gedient hat in vnser v^erbar ia^erleich an vnser vrawn tag ze der dienstzeit sechs schilling alter pfenning wienner vnd sein recht verchauft het herren Hainreichen dem Stainpekchen an vnsern willen vnd an vnser handen, von demselben herren Hainreichen wier wider mu^esten lo^esen mit viˆl mu^e vnd arbait vmb sechs vnd fu^emftzikch phunt alter wienner phenning. Daz selb recht an dem vorgenanten hof haben wier geben Chunraten in dem zaun mit aller der gewer vnd nutz vnd zu demselben hof geho^ert versu^echt vnd vnuersucht, vmb a^echt vnd funftzikch phunt alter wienner phenning. wir verhaizzen auch, daz dem (ob den) obgenanten Chu^enraten in dem zaun dhain chaft not dez beno^et oder dar zu trib, daz er verchauffen mu^est, swen er vns dann fu^er pringt, den wier gern haben ze einem holden, dem schu^ellen wier leichen nach seiner pet vnd nach vnsers Gotzhaus gewonhait mit allem dem Recht vnd dienst als in sein vorvoder Walther der Reichelsperger hat gehabtt von vnserm Gotshaus. Wier wellen auch vnd schullen des vorgenanten Hofs herren vnd gewer sein fu^er alle ansprach nach landesrecht. Daz die sach sta^et vnd vnuerchert beleib, darvber geben wir dem egenanten Chu^enraten in dem zaun disen brief ze einem v°rchund versigilten mit vnsern paiden Insigeln des Probsts vnd des Conuentus vnd mit den zeugen, die hie genant sint, her Sighart von Gru^eb, her Hainreich stainpekch, her Wernhart der Gnau^ezze, Alber der Premser, Herwort der Ludweigstorffer, Hainreich der Tobler, Haug der Ponhalm vnd ander lau^et genu^eg, den di sach chunt vnd gewissen ist. Der brief ist geben dez nachsten suntags vor sand Georuntag Nach Christi gepu^erd vber dreutzehen hundert iar darnach in dem ains vnd dreizzigstem jar.

Source Fulltext: OÖUB 6 (Wien 1972) S. 12f., Nr. 11