Ich Chunrat von Alydorf ze den Zeiten Purgraf datz Sa^eusenekk vnd ich Gu^et sein hausfraw veriehen vnd tu^en chunt allen den, die disen brief ansehent oder ho^ernt lesen, die nu lebent vnd hernach chu^enftig sind, daz wir mit wol verdachtem mu^et vnd mit veraintem willen mit gunst vnserr erben ze der zeit, do wir ez wol getu^en mochten, gegeben haben durch vnsrer sel hail vnd vnsern vodern ze einem ewigen selgera^et dem Ersamen Gotshaus datz sand florian vnsers gechauften gu°tes zwen ho^ef vnd ein lehen, daz wir gehabt haben datz Ha^ertweigsperge, vnd leit in sand Valteins pharre, vnd swaz dar zu° geho^ert ze dorff vnd ze veld, ez sey a^ekcher, holtz, wismad, waid, besucht vnd vnbesucht oder wie ez genant ist mit allem dienst vnd mit allem nutzz vnd mit allem dem recht, vnd wier dar an gehabt haben, ledichleich vnd freyleich, vnd verzeihen vns sein ga^entzleich also, daz wir vnd vnser erben ansprach darauf nimmer mer gehaben schullen, wier sein auch des vorgenanten gu^etes scherm des vorgenanten Gotshaus vnd gewer nach Landes recht ze O^esterreich. Wier haben auch die vorgenanten Gu^et geben auf daz vorgenant Gotshaus, daz vnser mainung, vnser pet, vnser gier ist, daz vnser paider Sun Wernhart, der sich Got da hin ergeben hat, von des probstes genaden vnd v^erlaub von dem selben Gu^et alle iar getro^estet werd ze pezzerung seiner phru^end, seins gewandes, seiner pu^ech oder ze weihen gaistleichen notdu^erften nach des ordens gewonhait, wo iemdes not ist ze seinen ta^egen, oder als long er der hilff bedarf vnd in nemen wil, vnd wellen auch vnsers iartag dar vmb enpern die weil. Swand aber daz ist, daz wernhart vnser sun nicht ist, ober (oder) bey lebentigem leib der hilff nicht bedarf oder niht inne haben wolt, von swelhen sachen daz waer, so su^ellen in gen vnser paider Jartag vnd sullen die di Herren von dem Conuent begen mit vigili vnd mit selmesse als in irem Gotshaus gewonhait ist. Vnd wer des vorgenanten Gotshaus danne Siechmeister ist, der sol daz vorgenant gu^et inne haben vnd da von an meinem jartag raichen den Herren sechs schilling wienner pfenning vnd sol auch an dem selben tag tailen Pro^et vnder arm Levt, waz man von einem Mutt Chorns pachen mag, vnd zwen Pachen vnd fv^emf Emmer weins sol er auch tailen vnder di selb arm levt. Ez sol auch der vorgenant Siechmaister an meiner egenanten Hausvrowen jartag raichen den Herren von dem Conuent sechs schilling wienner pfenning aller iar iaerchleich an alle widerred, — waer aber, des got nicht geb, daz man an dem vorgenanten vnserm jartag, als vor beschaiden ist, savmich waer an ainem oder an im allem, so sol, swer vnser nah Erbe ist, sich der vorgenanten Gu^et vnderwinden vnd als lang inne haben, vntz di savmung gentzleich gepezzert vnd widertan werd, vnd als di pezzerung geschieht, so sullen vnser erben mit den vorgenanten Gu^eten furbaz niht ze schaffen haben; wolten aber si ez furbaz inne haben, swer danne des vorgenanten Gotshaus vogt ist von der Fursten wegen, der sol ez dem vorgenanten Gotshaus wider in antwu^erten vnd sol sev daran scherm. Daz dise vnser Gotsgab vber vnser selgeraet der vorgenanten Gu^et von vns vnd von vnsern erben staet ebichleich beleib, als vor beschaiden ist, Dar vber geben wir dem oft vorgenanten Gotshaus datz sand Florian disen prief ze einem vrchunde bestaett mit vnserm anhangundem jnsigel vnd mit hern Eberharts von walse anhangundem jnsigel, der des vorgenanten Gotshaus vogt ist von den Landsfursten wegen. Der prief ist geben nach Christi Gepu^erd vber dreutzehen hvndert jar, dar nach in dem ains vnd dreizzigistem jar an sand Jacobstag in dem snit.

Source Fulltext: OÖUB 6 (Wien 1972) S. 28ff., Nr. 24