Ich Hainrich chersperger vergich mit disem brif allen den, di in sehend, ho^erend oder lesend, Daz ich mit wolbedachtem mut vnd mit gutem willn Gedrauten meiner Hausfrawn vnd aller vnserr erben han ze chauffen geben meim geswein herrn Vlreich dem fu^elich, vron Chu^enigunten meiner swester seiner hausfrawn vnd ir paider erben mein drittail, daz ich gehabt han an der Mu^el, di do haist Taschelhartz Mu^el, div rechtz aigen ist, vnd dor zu zwai drittail, di ich gehabt hau an den zwain guten datz Roepoltzwinchel, di auch rechtz aygen sind, mit alle dev vnd dor zu geho^ert ze Holtz, ze veld, besucht vnd vnbesucht vm ain gut, dez ich gantz vnd gar gewert pin, vnd der vorgenanten dreir drittail an den egeschriben guten sol ich vnd mein vorgenantev hausfraw vnd mein erben sein vnd seiner hausfrawn vnd ir paider erben gwer sein an aller der stat vnd in dez not ist fu^er ain rechtz chauf aygen nach Lantzrecht. vnd daz in daz staet vnd vnuerchert beleib, gib ich in disen brif versigelt mit mein jnsiegel vnd zu aim zeug mit mains vater insigel vnd wilhalms vnd hainrichs meiner vetern. Dez sint auch gezeug her Engelschalich von slu^ezzelberch, Teym von Penaw (sic), Otacher von Lerbuhel, Hertel von Hawnsperch, Fridreich Pauzzel, Helmweig platzinsgut, vlreich Roetel vnd ander erben laeut genuch. Der brif ist geben, do von Christi gepurd ergangen waren dreuzehen hundert iar darnach in dem aim vnd dreizzigistem iar an sand peters tag.

Source Fulltext: OÖUB 6 (Wien 1972) S. 26, Nr. 22