Nos Heinricus diuina miseracione prepositus, Fridericus decanus totusque Domus sancti Floriani Conuentus profitemur et tenore presentium protestamur, quod sine dampno et rerum nostrarum distraccione vineam modicam Sneider wlgariter dictam jn wachouia prope Ecclesiam sancti Mychahelis sitam curauimus nobis pro communi elemosina conparare et propter deum, qui nos et omnes fideles suos inuitat ad opera misericordie facienda, vineam eandem jnfirmarie nostre procuratori, qui pro tempore fuerit, assignauimus perpetuo possidendam Volentes, ut idem pro salute nostra et amore iesu christi, qui in egenis suis elemosinis cottidianis et pietatis operibus desiderat consolari, de prouentibus vinee predicte septem personas debiles et uirium corporis inpotentes cum septem denariis singulis ebdomatis perenniter consoletur. Decanus quoque, qui tunc pro tempore fuerit, fraterne salutis curam gerens predictorum denariorum amore dei debet esse misericors et prouidus distributor. Prefatus etiam prouisor infirmorum de prouentibus vinee supradicte tres pauperes, quibus in quadragessima (sic) pedes abluuntur in mandato peragendo cum sexaginta denariis tenebitur consolari. Et ne singule persone prelibate conmedant elemosinam ociosam, quelibet earum pro nostra salute omni septimana, siue illa die, qua suum denarium recipit, pro quolibet dicet Centum Ave Maria et quindecim Pater noster, vt nos voce diuina vocante mereamur audire: venite benedicti patris mei, percipite regnum, Esuriui enim et mihi manducare dedistis. Siquid uero jnfirmarius de prouentibus vinee residuum habuerit prenotate, studeat inpendere suorum necessariis infirmorum. In cuius rei testimonium Sigillis nostris presentes litteras confirmamus. Datum in natiuitate domini Anno domini Millesimo trecentessimo tricesimo secundo.

Source Fulltext: OÖUB 6 (Wien 1972) S. 82f., Nr. 73