Ich Vlreich der wolferoewter Vergich an disem brief vnd tv^en chunt allen den die in an sehent oder ho^erent lesen, Daz ich mit woluerdachtem Mu^ete, vnd da ich es wol getun machte mit aller meiner erben gunst vnd gu^etlichem willen Meiner sele vnd allen meinen vodern ze selgret ain Ebigen Jartag geschaffet vnd bestetigt han hintz der Pfarre datz sand Michel in der wachowe auf meim Cehent datz Habrukk vnd ouf Cehen Emmer weingu^elt auf ainer Mul vnd weingarten in der Mustinch, — man sol ouch den vo^ergenanten Jartag begeen alle iar an sand Niclastag mit Messe vnd vigili vnd sechtzig phenning ze Opher, zwai proet, ain diech Rindfleichs vnd ain Emmer weins, daz ander sol durich got armen leuten geben vnd ouch tailent werden. Ich offen, daz ich den vo^ergenanten Jartag zu begeen han enpholichen meim bru^eder Rudolfen dem wolueroewter, vnd wenne der nicht ist, so sol in begeen der nachst vnd der peste erbe vnder meinen vrewnden, den siw mit aim gemainem Ratt dar zu^e nement. Wer aber, daz siw dar. inn chriegen wollen vnd den Jartag da mit wolden sowmen, so sol der pharrer ze den Zeiten datz sand michel sich des egenanten Cehents vnd auch der weingult vnderbinden vnd sol iz so lange ynne halten vnd den jartag do von begeen, vntz sich mein erben des bedenchent, wem siw den vo^ergenanten Jartag beuelichen, vnd demselben sol der Pharrer den Egenanten Cehent vnd die weingult wider antwu^erttn an allen chrieg. daz ditz Gescheft also steet Ebig beleybe vnd vntzebrochen, darum gib ich disen brief versigelt mit meim Insigel vnd mit meins herren hern Jansen von Chunring Isigel zu^e eim geziuge. Nach christes gebu^erd dreutzehen hundert jar in dem zwai vnd dreizzikisten iar an sand Nycolai tag.

Source Fulltext: OÖUB 6 (Wien 1972) S. 79f., Nr. 70