Ich Rueger von Pernaw vergich vnd offen an disem Brief allen den, di in sehent oder hoernt lesen, di nv sind vnd her nach chunftich werdent, daz ich mit rat vnd mit guetem willen aller meiner Erben sunderlichen meins Brueders hern Otten von Chornspach gegebn han den Ersamen herren Probst Hainrichen vnd dem Conuent datz sand Florianshovs mein Hveb datz Wagrayn, di gelegen ist in Mitterchirher pfarre ewichlichen ze besitzen mit allem nvtz, div mein rehts aygen was vnd mich angviel von meinem rehtem Erbtayl mit fu^erzicht meiner Erben, vnd mit alle dem, daz dar zv gehort ze holtz, ze veld vnd ze dorff, versueht vnd vnuersuht, vmb einen rehten wider wechsel irs Hofs datz Poetendorf. Ich vergich ouch, daz ich vnd mein Erbn der ê genanten Hueb datz wagrayn des vorgenanten Gotishous vnd des Conuentz gwer schol sein nach Lands reht in osterrich. Vnd daz di red alz vor geschriben stet von mir vnd von allen meinen Erben staet vnd vnuerchert bleib ewichleich, dar vber gib ich dem vorgenanten Probst vnd dem Conuent disen Brief ze einem ewigen vrchvnd bestaett mit meinem anhangvndem Insigel, vnd mit meins brueders Insigel hern Ottens von Chornspach, vnd mit hern Eberharts von Walse Insigel Landrihter ob der Ens. — der sach sind zivg her Charel der Rech von Lvffenwerch, her Marchart der Chersperger, her Rueger der Wolfstayn, Pernhart der Jesnitzer, Albrecht der vidorfer, Wetzel von Erbing, Hainrich der Lasperger vnd ander erber Livt genveg, den die sache wol chvnt vnd gewizzen ist. Der Brief ist gegebn an vnser Vrowen tag zder Liehtmisse, Nach Gotis purd vber drevzehen Hvndert iar, dar nach in dem driv vnd dreiskistem Jar.

Source Fulltext: OÖUB 6 (Wien 1972) S. 85f., Nr. 76