Ich Chunrat von Alydorf, zden Zeiten Purkraf ze Sausenekk vergich vnd tun chvnt alle den, di disen Brief sehent oder horent lesen, die nu lebnt vnd hernach chunftich sind, Daz ich mit verdahtem mvet vnd vereintem willen vnd gunst aller meiner Erben zder zeit, do ich ez wol getuen mohtt gegebn han durch meiner vnd meiner Housfrowen selhail, vron Gueten, der Got gnad vnd allen minen vodern ze einem ewigem selgreth dem Ersamen Gotshous datz sand Florian meins chouften Aygen ein Guet haizzet ouf der O^ed vnd leit in Chalmuntzer pfarr vnd vreis Aygen ist, vnd swas dar zve gehort ze Dorff vnd ze Veld mit allem dienst vnd mit allen nvtzen also, daz ich vnd mein Erben ansprach dar ouf nimmer me gehabn schullen. Ich pin ouch vnd mein Erbn des vorgenanten Guets Gewer des vorgenanten Gotshous, als aygen reht ist in dem Land ze Osterreich. Ich han ouch daz vorgenant Guet gegebn ouf das vorgenant Gotshous also besunder, daz man alle iar an sand Annen tag habn schol ewichleich mitter hochzeit vnd ir aygen Hystori singen vnd mit aller tagzeit, alz gewonhait ist in dem selben Gotshous, Vnd schol der Brobst, oder swer daz Guet von seinen wegen inne hat, da von raihen alle iar an dem vorgenantem tag den Herren von dem Convent ayn pfunt pfenning vnd schol daz ewichleich niht abgen. Wer awer, des Got niht geb, daz man an dem vorgenanten tag, alz vor beschaiden ist, soumich wer an aynem oder an im allen, so schol, swer mein nohster Erb ist, sich des vorgenanten Gvets vnderwinden vnd alz lang inne habn, vntz di soumvng gaentzleich gebezzert vnd widertan ist, vnd alz di pezzerung geschieht, so schol der, der sich des Guets vnderwunden het, da mit furbaz niht ze schaffen haben, wolt awer er des wider sein, so schol, swer des vorgenanten Gotshous von der fursten, wegen Vogt ist, daz selb Guet wider in anwurten dem oft geschribn Gotshous vnd schol div herren dar an scherm. Daz disiv vnser Gotsgab vnd Stiftung, alz vor beschaiden ist, von mir vnd von allen meinen Erben vnd nahchomen staet ewichleich bleib, dar vber gib ich dem oft genanten Gotshous datz sand florian disen Brief ze vrchvnd bestetigt mit meinem vnd mit meins svns hern Walthers Insigeln Vnd mit hern Eberharts Insigel von walsse, der des vorgenanten Gotshous Vogt ist von den Landsfursten wegen. Der Brief ist gegebn an sand florians tag Nach Gotis puerd vber drivzehn hundert iar, dar nach in dem Vyer vnd dreiskistem jar.

Source Fulltext: OÖUB 6 (Wien 1972) S. 121f., Nr. 113