Ich Hainreich von Chersperch Wolfhartz sun auf dem Perig vnd mein Hausfraw Gedraut vnd all vnser erben veriehen offenleich mit dem brief vnd tun chunt allen den, die in ho^ernt lesen oder lesent, di nu sind vnd hernach chu^enftig werdent, daz ich mit wol bedachtem mu°t vnd mit gu°tem willen vnd wart meiner hausfrawn vraun Gedrauten vnd nach gunst aller meiner erben vnd nach rat meiner pesten freunt recht vnd redleich ze chauffen han geben herren vlreichen dem fulichen vnd seiner hausfrawen vraun Sapheiˆn vnd allen seinen Erben die mu^el, die gehaizzen ist Taschelhartzmu^el vnd ein drittail auf paiden Gu^eten ze Rapoltzwinchel, daz mein rechts aigen ist, mit sampt der Mu^el mit alle deu vnd darzu geho^ert ze holtz, ze veld versu°cht vnd vnuersu°cht auz vnserrn nutz vnd gewern in die iern vmb ein gu°t, dez si vns gantz vnd gar gericht vnd gewert habent Vnd schu^ellen auch der vorgenanten mu°l vnd dez egenanten drittail ze Rapoltzwinchel ier gewer sein ze Hoftayding an aller stat vnd in des not vnd du°rft geschicht an geveer, als dez Landes Recht ist, vnd daz in die sachh vnd die wandlung von mir vnd von allen meinen erben also sta^et vnd vnuerchert beleib, darvber geben wier in disen brief versigilten mit vnserm anhangundem jnsigil vnd ze einem pezzern v°rchu^end mit meins vetern fridreichs vnd wilhalms auch paider anhangunden insigel. Der brief ist geben ze Lintzz, do von Christes gepu°rd ergangen waren dreutzehen hundert iar, darnach in dem vier vnd dreizzigistem jar, an sand Merteins tag.

Source Fulltext: OÖUB 6 (Wien 1972) S. 142, Nr. 134