Albertus dei gratia Patauiensis Episcopus Venerabilibus et Religiosis viris . . Preposito et Conuentui Canonicorum Regularium monasterii sancti floriani Ordinis sancti Augustini nostre dyocesis salutem et affectus in domino salutares. Uirtutum exercicia et laudabilium operum merita, que cum prompte hospitalitatis beniuolentia in vestra vigent Ecclesia, sumptuosa quoque et sollempnia, que in decorem domus domini ibidem fiunt, edificia, digne promerentur, vt ad gratiam vobis faciendam reddamur liberales. Pro comodiori igitur onerum vestrorum supportatione deuotioni vestre concedimus et ex speciali gratia quemadmodum etiam a nonnullis predecessoribus nostris pristinis temporibus generose vobis indultum esse comperimus, omni jure, modo et forma, quibus melius et efficacius possumus, indulgemus, vt in omnibus et singulis Beneficiis ad Collacionem vel presentationem vestras spectantibus, in nostra diocesi constitutis, illis dumtaxat exceptis, de quibus veris pastoribus in absentia nichil solui consueuit, cum primum ea vacare contingerit (sic) fructus et obuentiones eorumdem per continuum triennium licite recipere et vtilitatibus Monasterii vestii applicare valeatis. Prouiso tamen, quod a nullo Benefitio amplius, quam per triennium emolumenta huiusmodi recipiatis, quodque ex presenti donatione nostra nullum ius perpetuum ea recipiendi vobis deinceps vsurpetis, Et quod Benefitia predicta pro tempore prelibato debitis obsequiis et consuetis ministris minime defraudentur. In quorum Testimonium presentes vobis tradimus litteras Sygilli nostri appensione Roboratas. Actum et datum Ebelzperch Anno domini Millesimo, CCC.mo Tricesimo quarto, in festo Vndecim Millium virginum.

Source Fulltext: OÖUB 6 (Wien 1972) S. 139f., Nr. 131