Ich Peter in dem Tawe, Pvrger ze Lintz vnd mein Housvrowe Katrey Vnd vnser payder Eriben wier veriehen an disem prief vnd tvn chvnt allen den, die in sehent oder hornt lesen, die nv sint vnd hernach chvnftich wernt, Daz wier gelten schvllen vnserm lieben besvndn vrevnt, Peter dem Schreiber, ze den Zeiten Mautter datz Nevnburch sechtzikch phvnt phenning wienner mvnzz, die er vns berait hat gelihen, Vnd der wier in wern schvllen, wann er ir nicht lenger rat haben wil, Tu^en wier des nicht, wiettann schaden er dez furbaz naem, den er gesagen macht pey seinen trevn, den schvlle wier im ab tu^en. Vnd haben im gesatzt fuer houpguet vnd fuer schaden Vnsern weingarten in der herstell mit allem nvtze, der do haizzt der hover. Vnd ist daz geschehen mit Pergchvrowen hant der geistleichen vrowen Swester Geyseln von wingchel, ze den zeiten Priorinn in dem Chloster datz Minnpach, der man alle jar von dem êgenantem weingarten geit an sand Michhelztag acht phenning ze Pvrchrecht Mit sottaner beschaidenhait, wann der vor genant Peter houpguetz vnd schaden nicht lenger rat wil haben, so schvlle wier in wern gar vnd gantz an allez gever, geschaech aber dez nicht, so schol er vns zv dem ê genantem guet her zve geben noch zwayr mann rat, die wier paydenthalb dar zve nemen vnd schol der vorgenant weingart sein rechtez der chouftez aygen sein zv rechtem purchrecht, daz vor genant ist an disem prief. Waer aber daz, datz wier vns noch der zwayr mann rat nicht gesammen maechten noch enwolten, so hat Peter, der ê genant ist, vollen gewalt den weingarten ze verchovffen oder versetzen vm daz vor genant guet, Mit vnserm guetlichem willen an allen irrsal, vnd wer daz, daz im doran ieht abgieng, daz schvll wier im ab tun, daz lob wier im mit vnsern trevn an aitz stat. Daz dev red staet beleib vnd fu^erbaz vnzerbrochen, dor vber geb wier im disen prief zv einem vrchvnd vnd zv einem warn getzevg dierr sache, versigelt mit der vorgenanten Perchvrowen Insigel, wand wir selb nicht aygens jnsigels gehabt haben, der prief ist gegeben Noch Christes gepu^erd drevtzehen Hvndert jar darnach in dem fumf vnd dreizzigistem Jar, dez naesten vreitages noch vnser Vrowen tag zv der schidvng.

Source Fulltext: OÖUB 6 (Wien 1972) S. 175f., Nr. 168