Ich Ludweig Fluschart vnd mein Hausfraw Katrey vnd alle vnser Erben veriehen offenbar vnd tu^en chunt an disem gegenwu^ertigen brief allen den, die in sehent oder ho^ernt lesen, die nu sind oder hernach chunftig: werdent, daz wier Margreten Wolfharts Seydleins Tochter geben schu^ellen alle iar zwai schaf chorens vnd ain schaf hobern an vnser vrawen tag ze der dienstzeit vnd ein halbes phunt phenning wienner mu^enzz halb an sand Jo^ergentag vnd halb an sand Merteinstag vnd alle die weil wir der egenanten Margreten iern dienst geben ze der zeit, als vor verschriben ist, so hat die vorgenant Margret hintz mier Ludweigen noch hintz meiner egenanten Hausfrawn noch hintz meinen Erben nicht ze sprechen noch mit dem Gu^et, da wier ir den dienst von raichen, nicht ze schaffen. Wa^er aber, daz wir den egenanten dienst versa^ezzen vier wochen nach der zeit vnd verschriben ist, so hat die vorgenant margret iern dienst an vns ze vodern mit der zwispilde. Wa^er aber daz, daz wir dez dhain widerred hieten, daz wir die zwispild nicht wolden geben der egenanten Margreten, wietann schaden si dez na^em, da schol si mich egenanten Ludweigen vnd mein egenanten Hausfrawn oder mein Erben vmb phenten mit vnserm gu^etleichen willen oder wen si darzu schaft, vnd schol sich die egenant Margret iers Gutes vnderwinden vmb den versezzen dienst iern frum damit schaffen, wier schullen ier auch iern dienst raichen in ainer meil, wo si den hin vodert vnd als vil mer nach der egenanten Margreten tod, so schu^ellen wir geben zwelif schilling phenning wienner mu^enzz in acht tagen ze selger\et ab ierr sel, swo si die hin schaffet oder swer vns prief zaigtt Ludweigen oder Katrein oder vnsern Erben ga^eb aber wir der zwelif schilling nicht, so sol mich, der den brief zaigt oder mit wem ez geschaft wiert, ze Mauthausen in ein erber Gasthaus vodern mit zwain pheriften ze laisten als laistens recht ist, vnd nimmer daraus cho^emen, ez werden dann die zwelif schilling geben ze vrchund vnd ze einem selgera^et ierr sel. Daz die red sta^et beleib vnd vnuerchert, gib ich obgenanter Ludweig der fluschart disen gegenwu^ertigen brief der oft genanten Margreten verslozzen vnd versigilt mit meinem anhanglindem Insigel ze einem waren vrchu^end mit den erbern zeugen, die hie geschriben sind, her Hagen weilent purgraf ze Spilberch, her Herman Purgraf ze Spilberch, her Charel der Rech von Luffenberch, her Marichart von Chersperch, her Fridreich Schrautolf ze den Zeiten Lantrichter in der Ryedmarich, her Ott von Perchaim, Jans von Wu^ermtal vnd ander erber lau^et, Der brief ist geben, do von Christes gepu^erd waren vergangen Dreutzehen Hundert iar, darnach in dem fumf vnd dreizzigistem iar an sand Stephanstag zwischen den snyten und swenn datz pazzaw antloz ist vnd genad vnd grozzer Jarmarcht ist.

Source Fulltext: OÖUB 6 (Wien 1972) S. 174f., Nr. 167