Ich Chunrat von Go^etzeinstorf vergich offenwar vnd tuen chunt allen den, di nv sint oder noch chvnftich werdent ewichleich, Daz ich mit wolbedachtem muet vnd mit aller meiner Erben guetleichem willen han gegebn den Ersamen vnd Gaeistleichen herren hern Hainreichen zden zeiten Brobst vnd der Samnvng des Gotishous datz sand Florian ze rehtem widerwechsel die Aygen, div her nach geschriben stent vnd die mein rehtt Chaufaygen gewesen sint, Ayn Hueb datz Rorbach, da zden zeiten Hainreich der Pinter ouff gesezzen ist, Vnd ein Hueb an dem weingarten ze Toetling, vnd dreu Guet pey sand Galn Nivnchirchen, ayns datz dem Stayn, zway in dem Roeut, div alle sehtzk vnd fumf pfunt pfenning gelts sind wienner Munzze vmb alles vil gelts, daz mir daz vorgenant Gotishous herwider gegebn hat ouz ir altem Vrbar datz waldprehtstorf, da selben datz waldprehstorf drey Hueb, datz Weitenpeunt ein Mvl, datz Antzenperg ein Hueb vnd auf einem akcher, haizzet der vmbvanch sehtzk pfenning. In der Awe pei der Traysem auf Garten sechs vnd Vyertzk pfennig, datz Eysgerstorf fumf vnd zwayntzk pfenning, datz waldprehtstorf auf einem weingarten drey pfenning. Die selben mein ê genant Guet han ich gegebn dem vorgenantem Gotishous fuer reht vreys aygen mit alle dem, daz dar zve geho^ert ze Holtz vnd ze veld versueht vnd vnuersueht, ledichleich vnd vreyleich also; daz ich noch dhain mein Erben ansprach dar auf nimmer me gehabn sehullen. Ich pin auch der vorgenanten Gvet Scherm vnd Gwer fuer alle ansprach, alz aygens reht ist in dem Lande ze Osterreich vnd ob der Ens. Wer auch, daz dem vorgenantem Gotishous dhain Chost oder arbait von ansprach dar auf gieng, daz schol ich in vnd mein Erben vnd Nachchomen nach mir gaentzleich ablegen vnd schullen daz haben auf den vorgenanten Gveten, die si mir ze widerwechsel gegebn habnt datz waldprehtstorf vnd auf alle dem, daz ich han in dem Lande. Daz diser wechsel dierr vorgenanten Guet, alz vor beschaiden ist, von mir vnd von allen meinen Erbn vnd Nahchomen stet ewichleich.vnd vnzebrochen bleib, dar vber gib ich dem vorgenantem Gotshous datz sand Florian disen Brief ze vrchvnd bestetigt mit meinem anhangundem Insigel vnd durch pezzer sicherhait dierr sache han ich meinen herren hern Eberharten von walsse datz Lintz, Pfleger ob der Ens gepeten, daz er auch ze gezivg sein Insigel dar an hat gehangen. Dierr sache sind zivg her Hainreich vnd her Seyboth, prueder von Volchenstorf, mein Sweher her Dietreich der wenisch, vnd her Wenisen sein Svn, her Hainreich der Stainpekch, her Charel der Rech von Lvfftenwerch, her Dietmar von Aystershaim, Dietmar der Wolfstayn vnd ander erber Leut genueg den di sache chunt vnd gewizzen ist. Der wechsel ist geschehen, vnd ist der Brief gegeben, do von Christi puert ergangen waren dreuzehen Hundert Jar, dar nach in dem sechs vnd dreyskistem iar, an sand Mathyas tach.

Source Fulltext: OÖUB 6 (Wien 1972) S. 201f., Nr. 196