Wier Hainreich vnd Seyboth paid Prueder von Volchenstorf veriehen vnuerschaidenleich vnd tuenen chunt alle den, di disen Brief sehent oder horent lesen, di nvd lebnt oder hernach chunftich werdent ewichleich, Daz wier bedehtichleich vnd nach rat vnserr besten vriunt vnd mit guetem willen vnd gunst aller vnser Erbn zder zeit, do wir ez wol getuen mohtten gegebn habn dem Erbern Gotishous vnde der Samnung datz sand florian ahtt pfunt gelts niderhalb der Ens pei Choting auf vberlent ledichleich, versueht vnd vnuersueht mit allem nutz, als wier sev gehabt habn, an alain behalten wir vns alle vnser vischwaid, di wir habn ouf der Ens vnd in Loˆn, sunderIeich vnser Mulstechen swo wir hin di slahen wellen ouf oder nider pei dem wazzer ouf dem êgenanten Guet, daz wir gebn habn dem vor geschribn Gotishous mit sottanen setzen, Swer des vorgenanten Gotishous zden zeiten Siechmaister ist, der schol di Gult inne habn vnd schol da von iaerchleichen von vnser isleichem an seinem jartag raihen der êgenanten Samnvng ain pfunt pfenning vnd schol man vnsern iartag begen gentzleich mit vigili vnd mit selmisse, als irm rehtem prueder. Ez schol ouch der vorgenant Siechmaister Chorn chouffen vmb driv pfunt pfenning, swi vil er dar vmb gewinnen mag zwischen sand Jacobs tag vnd weihnahten vnd vierfachen vmb zwelf schilling vnd sol daz tailen vnder arm Leut, vnser isleichen sein tail an seinen iartag. Ez schol aber der êgenant Siechmaister vnser isleichen frvmen dreisk Misse alle iar zwischen sand Merteins tag vnd weinahten vnd isleichem dreisk zwischen Ostern vnd pfingsten vmb zwelf schilling pfenning, daz werdent also ahtt pfunt, swaz dar vber chlains dienstes werden mag, iz sei von huern, von Gensen, von Chaesen, von airn oder von vngelt, daz schol dem egenantem Siechmaister werden fuer sein mue vnd schol ouch da von haizzen pachen daz vorgenant almusen, vnd begen alz das vor geschriben stet, — wir schullen auch der vorgenanten gult gwer sein vnd vnser Erben fuer alle ansprach an aller stat nach Lands reht. Daz dise gab des vorgenanten Guets von vns vnd von vnsern Erbn stet vnd vnuerchert bleib, dar vber gebn wir dem vor genanten Gotishous disen Brief ze vrchund bestetigt mit mein Hainreichs von Volchenstorf Insigel vnd woˆn mein vorgenant Prueder nach dem Gescheft vnlang lebt, hat her Hertneid von Losenstayn. meins êgenanten Prueders wytib rehter Prueder nach ir bet sein Insigel zu geziug dar an gehangen. Der Brief ist gegebn nach Gotis Puerd vber drivzehn Hundert iar, darnach in dem sechs vnd dreyskistem iar an sand florians tag.

Source Fulltext: OÖUB 6 (Wien 1972) S. 206f., Nr. 202