Ich Piligreim von Shallenwerch vnd mein Havs Vrowe Wentel vnd mein Vatter Pilgraim der alt von Shallenwerch vnd mein Prv^eder Paul vnd all vnser Erben vergehen ofwar an disen Prief vnd tv^en chunt allen denn, dew in sehent oder horent lesen, dew nw lebent oder hernach chvnftich werdent, daz wir mit wol verdachtem mv^et vnd mit Gvetleichem willen aller vnser Erben ze der zeit, dw wir iz wol machten tv^en, haben ze chavfen gewen dem Erbern Ritter hern Ortwein von Waltpv^erch, im vnd sein erben vnd sein chinden den hof ze Wolcheinstorf vnd ein hveb vnd zwo hofstet vnd wi wirz do haben vnd den zehent dor auf, iz sey ze holtz vnd ze velt, versu^echt vnd vnversvecht, pestift vnd vnpestift, iz sey lehn oder aigen, haben iem vnd sein Erben gewen ze Rechtem aigen vm zwaimisimtzch (sic) phunt alter wienner phenig Mv^enz vnd svl wir des Guetes ze Wolcheinsto^erf vnd swaz wir da haben des vorgenanten hern O^ertwein sein oder seiner Erben gewer sein ze hof vnd ze taiding vnd vm daz vor genant guet fu^er in sten an aller stat vnd swaz des der vorgenant her Ortwein von Waltpu^erch, er oder sein erben indert chain shaden nemen, den sol er haben avf mir vor genanten Pilgreimm von Shallenwerch vnd auf mir altem Pilgraim von Shallenwerch vnd auf aller vnser hab, swo wirz in dem land haben, vnd dor vber vergich ich vor genantew Wentel, daz ich mich han furzicht tann vor Ritter vnd vor chnechten des vor genanten gu^et ze Walcheinstorf, ich vnd allew meinew chint vnd chain ansprach dorauf sol nimer mer gehaben, weder mit worten noch mit werchen noch vm mein Morgen Gab, vnd han dor vm ze fu^erzicht genvmen zway phvnt phennig vnd mein Chinden XXXII. Vnd daz im dew Redt also stet vnd vnferchert peleib, Dor vber gib ich vor genanter jvnger Pilligreim von Shallemwerch und mein vater der alt von Shallenwerch disen prief zw einem gewern, im vnd sein Erben mit vnsern zwain anhangvnden jnsigel. Diser prief ist gewen, dw man zalt von christus gepu^erd drew zehen Hundert Jar, dor nach in dem sexs vnd dreizechisten Jar an sand Tomanstag, dew wandlung is geschen ze Wesenwerch af dem haus.

Source Fulltext: OÖUB 6 (Wien 1972) S. 223f., Nr. 219