Wir drei Swester Ann, Vrsel vnd Affer Petreins To^echter dez Milichtopfen von Steyr, dem Got genad, veriehen vnd tuen Chunt allen den, di disen Prief sehent oder ho^erent lesen, di Nu sind vnd hernach chunftich werdent, daz wir durich recht notturft nach vnserr pesten vreunt Rat vnd mit guetleichem willen vnser O^eheim Petreins vnd Erhartz hern Hagen su^en von Spielwerch vnd ouch vnserr Pasen vrown Vrseln vnd aller ier Erben Dem erbern Goczhous vnd der Samnung dacz sand Florian verchouft haben ledichleich Vier Guet, di ligent in sand Oswald Pfarr vnd haist an dem O^echsenperig, di wir ze lehen gehabt haben von vnserm Herren dem Hertzogen ze O^estereich, di in Gult sechtzg vnd drew pfunt alter pfenninge habent mit furtziht aller der, di vor benant sind, vnd mit alle dew vnd dar zue geho^ert versuecht vnd vnuersuecht, wi is genant ist, vmb fumf vnd Viertzk Pfunt alter Wienner pfenning, der wir gancz vnd gar gericht vnd gewert sein. Wir welln ouch der selben Guet dez vor genanten Goczhous geweren sein an aller stat, wo in dez duerft geschiecht vnd waz in daran ab gieng, das schulln di Herren vnd daz Goczhous dacz sand Florian haben ouf vnserm Weingarten, der leit an dem Gebling, der mit den vorgenanten phenning von den Juden gelo^est ist, vnd czw pesser sicherhait secz wir in ouch vnsern pesten vreunt hern Hagen von Spilwerch, waz dem vorgenanten Goczhous an vns vnd vnser hab abge, daz sew daz haben ouf aller seiner hab vnd aller seiner Erben hab, wo sew di haben in dem Land cze O^estereich vnd ob der Ens. Daz di wandlung also stet vnd vnuerchert beleib, dar vber geben wir dem oft genanten Goczhous disen Prief vnd wand wir aigens jnsigels nicht enhaben, bestet wir in mit vnsers vreunt hern Hagen jnsigel von Spilwerch, der ouch der vorgenanten Guet vnser lehentrager gewesen ist vnd czw einer pessern bestetnu^ezz hab wir gepeten hern Vlreichen von Gruenwurch vnd hern Reinprechten von Walse daz di ir jnsigel dar an gehangen habent. Der Prief ist geben nach Christi gepuerd vber drewczehens hundert jar in dem Vierczkisten jar an sand Merteins Tog.

Source Fulltext: OÖUB 6 (Wien 1972) S. 355f., Nr. 350