Ich Wulfinch der Gusner vnd ich Margret sein hausvraw vnd ich Thoman von Mewerperig vnd ich Christein sein hausvraw, vnd ich Peters, derselben Christein swester, paid dietreichs dez hager vnd der vorgenanten Margreten to^echter vnd dartzue all vnser erben, wier verichen vnuerschaidenleich vnd tu^en chunt allen, di disen prief sehent o^eder horent lesen, daz wier tzwai gu^et inne gehabt haben, deu gelegen sint datz Taenne in Hoedigeinsperger pharr vnd viertzehen schilling geltz sint vnd haizzent auf der hu°b ze rechtem lantz satz von Ortolfen hern lewen sun von wartperig vnd von allen seinen erben vmb sechtzig phunt phenning newer wienner munz ze lo^esen iaerchleich an sand Jacobstag mit alleu deu, vnd dar tzue gehort, versucht vnd vnuersu^echt, vnd auch wier auf di selben gut vnd auf den satz getailt sein mit rechter fu^ertzicht vnserr pru^eeder Fridreichs vnd Vlreichs, vnd haben auch dez satzes vnserr jar enuollen mit staet gueter prief. Den selben satz haben wier mit wol bedachtem mu^et vnd nach rath vnserr na^echsten vreunt vnd mit gu^etem willen vnd gunst aller vnser erben ledichleich gegeben vnd in geantwurt ze der tzeit, vnd wier iz wol getu^en mochten dem ersamen gotshaus datz sand Florian vnd der samnung da selben mit aller der sta^et vnd wier dar vber gehabt haben, vnd mit allen den nu^etzen, vnd wier ez inne gehabt haben, vmb di vorgeschriben pbenning, der wir gar vnd gantz gewert sein, wer aber ieman vnder vnsern erben, der die vorgenanten gu^et oder den satz haben wolt, oder dar nach sprechen wolt, der schol dem e genanten gotshaus geben di vor geschriben sechtzig phunt phenning auf den egenanten tag vnd schullen danne die gu^et von dem gotshaus ledig sein. Daz die wandlung der gu^et vnd dez satz staet vnd vntzebrochen beleib, als vor geschriben ist, dar vber geben wier disen prief versigilten mit der erbern herren jnsigel vnd mit den tzeugen, di ir jnsigel dar an gelegt habent, daz iz her Jans von Chapell vnd her Heinreich von volchenstorf vnd her vlreich der jung von Chapell, die wier dienstleich darumb gepeten haben, daz si ir insigel dar an gehangen habent, wand wier aygner jnsigel nicht enhaben, mit den tzeugen, di hie geschriben sint, her Heinreich von O^ed ze den tzeiten purchgraf ze windek, her lorentz von o^ed, Chunrat der Rigler, Heinreich sein prueder, vlreich der Marschalich, Jans von Wu^ermtal. vlreich der laune, vlreich der Richter von Mauthausen vnd ander erber leut genug, den diseu sache wol chunt st. Der prief ist gegeben, do man von Christes gepu^ert tzalt dreutzehen hundert jar vnd dar nach in dem tzwai vnd viertzgisten jar an sand Mathyas Tag.

Source Fulltext: OÖUB 6 (Wien 1972) S. 404f., Nr. 402