Ich Otto der Wolferewter vnd Ich Agnes sein Hausvrawe vnd all vnser Erben Wir veriechen offenleichen an disem prief, Daz wir vnsern zechent, der da leit ze Harbruk, auf den wir getailt sein mit rechter furzicht von alln vnsern Erben vnd auch vnser purchrecht ist von dem erbern gotshaus ze sand Florian, da wir in alle iar acht phenning wienner mu^enz ze rechtem purchrecht von geraicht vnd. gegeben haben an sand Michhells tag, Den selben zechent hab wir verchauft mit guetem wiln vnd gunst aller vnser Erben dem egenanten goteshaus vnd der samnung ze sand Florian vmb ain vnd vierzik phunt phenning wienner mu^enz, der wir aller gantz vnd gar gebert sein. Wir haben auch durch vnser sel hail willen geben dem vorgenanten gotshaus vier phenning purchrechtes auf aim paungarten datz Wesendorf pei der Tuenaw ze nechst Florianer hof, vnd geben in dar vber disen prief zem offen vrchunde diser sach versigelt mit meim insigel vnd mit meiner vetern insigel Adolfs vnd Wolfgans. Der prief ist gegeben datz Melch nach Cristes gepu^erd vber dreutzechen Hundert jar, darnach in dem zwai vnd vierzikisten jar an gotez leichnam tag.

Source Fulltext: OÖUB 6 (Wien 1972) S. 413f., Nr. 409