Ich Elspet Herren Dietreichs dez Wenischen witib von der Vreynstat, dem Got genad, vergich vnd tu^en chund an disem brief allen den, die in sehent oder ho^ernt lesen, daz ich han gechauft vmb mein aigenhaft varent gu^et ein Haus datz Ens in der stat ze einem rechten pu^erch recht zwelif phenning, die man alle iar geit dem statrichter an sand jo^ergen tag, vmb vier vnd viertzig phunt phenning von Weiglein von Neunburch vnd daz selb Haus han ich gegeben ze den zeiten, do ich ez wol getu^en mocht mit rat vnd gunst meiner pesten freunt dem erbern Gotshaus vnd der Sammung datz sand Florians haus ze trost vnd ze selgera^et meiner sel mit allem dem Recht vnd ich ez han gehabtt in nutz vnd in gewer an alle ansprach also beschaidenleich, wann daz ist, daz got vber mich gepeut, so schu^ellen si meinen Leichnamen pringen, wo ich stirb in dem Lant, mit ierr chost zu der begrebnutzz in ier chloster vnd schullen mier an demselben tag alle iar vnd an dem Sibenten vnd an dem Dreizzigisten begen in ierm vorgenanten Gotshaus meinen jartag mit Mess, mit vigili als ierm pru°der ainem vnd darvmb schol man den herren geben in die Oblai an dem ersten, an dem sibenten vnd an dem dreizzigistem alle tag ein halb phunt phenninge von dem vorgenanten haus, daz werent alle iar zwelif schilling vnd auch fu^enf schilling, die emoln auf dem haus gelegen sind ze dienst dem vorgenanten Gotshaus. waz aber dez vbrigen wiert von dem Haus, daz schol man geben ze stat pu^erchrecht, alz ez gewo^endleich ist ze geben, vnd datz ditz selgera^et vnd diseu wandlung sta^et vnd vnuerchert beleib, darvber gib ich dem oftgenanten Gotshaus disen offen brief versigilten mit Schefoltz ze den Zeiten statrichter ze Ens anhangunden jnsigel, der brief ist geben datz sand Florian Nach Christi gepu°rd dreutzehen hundert iar vnd darnach in dem zwai vnd viertzkistem iar, dez nachste montags nach sand Veyts tag.

Source Fulltext: OÖUB 6 (Wien 1972) S. 414f., Nr. 411