Ich Wilhelm vnd alber vnd v°lreich pruder vnd Elspet vnd Katrey vnser swester Chu°nrats des wolfrau°ter chint wir veriehen vnuerschaidenleich, daz wir nach rat vnd gunst vnsrer nachsten vnd pesten freunt Ulreichs dez Tucheln, Ottens dez wolfrau°ter, wolfgangen vnd adolfs pru^eder der Wolfrau°ter vnd mit gunst vnd gu°ten willen aller vnserr erben verchauft haben ze der Zeit, do wir ez wol getu°n machten, vnsern zehent datz Habrukk, der vns an geerbet hat von vnserm vater vnd von mu°ter vnd darauf wier getailt sein mit rechter fu^erzicht aller vnserr erben vnd vnser recht pu^erchrecht gewesen ist, von dem Ersamen Gotshaus ze sand Florian ze acht phenning wienner mu^enzze iarleich ze geben an sand Michels tag. denselben zehent haben wier gegeben dem vorgenanten Gotshaus mit allem dem vnd darzu^e geho^ert versucht vnd vnuersu°cht vmb ains vnd viertzikch phunt wienner phenninge, der wir gantz vnd gar gewert sein. Wir verhaizzen auch daz vnuerschaidenleich, ob dem egenanten Gotshaus dhain chrieg auf stu°nd vmb den vorgenanten zehent, dez daz Gotshaus dhainen schaden na^em oder mo^echtt genemen, den schullen wir in auz richten vnd wider cheren. Swo aber dem vorgenanten Gotshaus dez ich abgieng, daz schullen si haben auf allem dem, daz wir haben in dem Land ze Osterreich, daz diser chauf vnd diseu wandlung sta^et vnd vnzebrochen beleib, darvber geben wir diseu brief versigilten mit meinem jnsigel vnd wann mein vorgenant geswistreid aigen insigel nicht habent, haben wir gepeten vnser nachst freunt Vlreichen den Tu^echlein, Otten den Wolfrau^eter, Wolfgangen vnd Adolfen paid pru^eder von Wolfreut, daz di zu gezeug ier jnsigel daran habent gehangen, Wann si bey der wandlung selb gewesen sind vnd ander lau^et genu^eg, Der brief ist geben nach Christes gepurd vber dreutzehen Hundert iar vnd darnach in dem dreu vnd viertzkistem iar an sand Gedrauten tag vor mitter vasten.

Source Fulltext: OÖUB 6 (Wien 1972) S. 440f., Nr. 435