Ich Vllrich vonn Capelle vnnd all meine Erben verjechenn öffentlich mit dem brieff allen den, die jn sechen oder hören lesen, das wier durch Gott zuvodrist vnnd durch meiner lieben dochter Ver Annen willenn, die Ich Gehn Pulgarn jnn das frauen Closter jn des heilligen geists ordten geben hab, demselben Closter den frauen vnnd den briestern daselbs gegebenn hab dreu Lechen, die gelegenn Sündt jn dem dorff zw Pulgarn, mit aller dev, vnnd dartzue gehörtt versuecht vnnd vnversuecht, mit allen den nutzen, Rechten vnd Ehren, alss Ich Sye jnn aygenns gewer herbracht hab, also beschaidentlichen, das die vorgenanten dreu lechen meiner vorgenanndten dochter ver Annen dienen sollenn vnntzt ann jeren dott vnnd nach jerem dott so sollen dieselben dreu lechen diennen vnd wardunt sein dem vorgenanndten Closter zu Pulgarn den frauen vnnd den Briestern daselbs Ebigclichen vnnd freilich ann alle widerredt, wier thuen auch Ich vorgenannter von Capellen vnnd all meine Erbenn demselben Closter zu Pulgarn vnnd sonderlichen meiner lieben dochter daselbs die güet vnd die genadt, die guetter vnnd alle die guetter, die Ich vnnd all meine voruordern zu demselben closter gegebenn haben, wo die jnn meinen schreinen (schrannen?) vnd Purgckhfridten ligenn oder vnnder meinen vesten, wo ich die vnnd all meine Erbenn haben, vnnd die Leuth, die auf denselben güettern Sitzen vnnd wohnung haben, sollen vor der frauen vnnd briestern zu Pulgarn Anwaldt bey dem Closter daselbs oder annderstwo auf jeren gründten, wo es jnn aller fuegligisten sey, vmb aller clag vnd Ansprach, wer hintz in zu sprechen hatt, zu Recht stehn vnnd nindert andterstwo vnd sollen auch die wänndel darumb zu demselben Closter geuallenn gehn Pulgarn, Ich main auch vorgenanter vllrich von Capell vnd all mein Erben, all aufleuf vnnd vntzucht, die bey demselben Closter zu Pulgarn beschechen, es sey von meiner Leuth weegen oder von desselben Closter Leuth weegen oder von welcherlay leidten zu Pulgarn bey dem Closter der frauen vnnd der Briester daselbs vnd nindert alsswo, enbieten auch ich vorgenannter vllrich von Capell vnd all mein Erben allen vnsern Purgraffen, Pflegern vnnd Ambtleutten, das Sye die vnnsern dartzue haldten Stergckhlichenn vnnd allss lanng, vnntz das die vnnsern völligclich pessern, allss vorgeschriben Stett. es mügen auch mein vorgenannte dochter vnnd anndre Closterfrauen vnnd die Briester zu Pulgarnn vnnd all jere nachkhomen daselbs jere schennckhheusser woll haben aines oder mengers, wieuill Sye der bedüerffenn, bey demselbenn Closter oder jnn dem dorff, Es sey Enhalb des Reichenbachs oder hinderhalb, darjnn Sye jer wein schenckhenn oder auf anndern jeren güettern mügen Sye auch woll jern wein aussschenckhen oder wo es jnn allerfueglich ist. vnnd das dise Rett füerbass also Stätt vnd vntzerbrochen bleibe, darüber so gib ich vorgenanter vllrich von Capelln füer mich vnnd all mein Erbenn den brieff zu ainem offen vhrkhundt vnnd zu ainer gantzen Sicherhait versigellt mit meinem anhangundten jnnsigl vnd mit des Erbaren herrnn jnnsigl meines oheims herrn Eberharts von wallsee haubtman ob der Enns vnd mit meines brueder jnnsigl Eberharts von Capelln, die der Sach Zeug Sündt mit jeren anhangundten jnnsigeln. der brieff Ist geben nach Cristy gebuerth 1345isten Jahre Ann Sanndt Philips vnnd Jacobs tag der heilligen 12 Pottenn.

Source Fulltext: OÖUB 6 (Wien 1972) S. 510ff., Nr. 507