Ich hainrich der Pu^echer von Alckhouen vnnd mein hausfrau Gerdraut vnnd all vnnser Erbenn veriechen vnnd thuen khundt allen Leutten, die disen brieff annsechent, lesent oder hörenndt lesenn, die nun lebent vnnd hernach khunfftig werdtenn, das wier mit wolbedachtem muett vnd mit güettlichem willen nach vnnser besten freundt Ratt versatzt haben vnnser hueb, die gelegenn Ist jnn Rieder Pfarr vnnd ist Gehaissen zu grabm vnnd ist vnnser Rechts aygenn gewesen vnnd auch noch ist, wenn wier Sye lösen, der Ersamben Geistlichenn frauen frauen Anna von Capelln obriste maisterin zu Pulgarn jnn dem ordten des heilligen Geistes vnnd dem Conuent daselbs füer zway vnnd dreissig Pfundt Pfening allter wienner münss, der wier gantz vnd gar gericht vnnd gewerdt Sein. ich bin auch obgenanndter hainrich der Pucher, mein hausfrau vnnd all meine Erbenn der Ehegenanndten meiner Frauen von Capelln vnnd des Conuents des obgenanndten Satzes der hueb jer gwer füer all annsprach ann aller der Stätt, vnnd jnn des nottuerfft beschiecht, alss Satzes Recht Ist jnn dem Lanndt zu Österreich, vnnd haben in auch die hueb gesatzt mit allenn den nutzenn, vnnd dartzue gehöret versuecht oder vnuersuecht, wie das genanndt ist vnnd als vor geschriben Stett. das der vorgenanndten meiner frauen von Capelln vnnd dem Conuent des Gottshaus zu Pulgarn das von mier vnnd von allen meinen Erbenn Stätt vnnd vntzerbrochen bleibe, darüber gib ich hainrich Pucher disen brieff mit meinem Annhangundten jnnsygel versigellt. des Ist Getzeug mein geschwei vllrich der haager mit seinem annhanngundten jnnsigl. Der Brieff ist geben nach Christus gebuerdt dreytzechen hundert Jahre, darnach jnn dem fünffvndviertzigisten Jahre Ann dem Auffart Tag.

Source Fulltext: OÖUB 6 (Wien 1972) S. 512f., Nr. 508