Wir Jans vnd leutolt, paid pru^eeder von Chunring veriehen vnd tu^en chunt offenbar an disem prief allen den, di in sehent oder ho^erent lesen, daz wir vns haben an genomen fu^er vnser purger datz der weizzenchirchen in der wachaw, di sich verpunden haben dem pharrer datz sand Michel in der wachaw ze chauffen zehen phunt wienner phennig geltes vnd im di ze raichen vierstund in dem jar alle quatertemper drithalb phunt phennig vmb einen Gotsdienst, als verschriben ist an irem prief, den si habent von dem Gotshaus datz sand florian. Wer auer, daz si dar an saumig wa^eren vnd dem pharrer datz sand Michel, der zden zeiten ist vnd hernach chumftig wirt, di phennig nicht geben zden ta^egen, als verschriben an irem prief, so verpint wir vns fu^er sev dem Gotshaus datz sand florian vnd auch ze sand Michel, daz wir seu dar tzue no^etten schullen, daz si di phennig raichen dem pharrer datz sand Michel zden ta^egen, als verschriben ist an irem prief. Vnd daz daz allez sta^et vnd vnuerchert beleib, dar vber geb wir disen offen prief versigelten mit vnser paider anhangunden insigeln. Der Prief ist geben nach Christ gepu^erd dreutzen hundert Jar, dar nach in dem sechs vnd viertzigistem jar an vnser vraun tag.

Source Fulltext: OÖUB 6 (Wien 1972) S. 539f., Nr. 533