Wir Heinreich von Gotes gnaden Probst, Fridreich Techent vnd di sampnung dacz sand florians hous veriehen vnd tuen chunt offenwar an disem prief allen den, di in sehent oder ho^erent lesen, daz wir wol bedacht mit veraintem muet Durch gotz lieb vnd vnser vrawn ze dinest vns verhaizzen haben geg dem Gotshous ze Wachaw dacz der Weizzenchirchen, daz wir daz selb gotshous von der pharr von sand Michel, di wir selben inne haben, besingen schuln haizzen alli tag taegleich an all savmung ewichlich mit einer Messe, Nu er an dem antlaztag vnd .an dem charvreitag so sol daz pharrvolch gemainclich pei der Pharr sein ze sand Michel, ze Weinachten, ze Ostern, ze phyngsten, an gotes Leichnamstag vnd an allen vnser vrawen têgen vnd an aller heiligen tag vnd an dem chirchweichtag vnd an dem Paln tag vnd an aller zwelf boten tag, nuer alain an sand Matheus tag nicht, der ist in dem lesen, vnd an sant Mathyas tag auch nicht, der ist vmb den vaschanch, an den andern vorgeschriben taegen alln schullen ein Priester vnd ain schuller dacz der oft genanten chirchen dacz Wachaw an igleichem abent vesper singen vnd dez Margens Mettein vnuerzogenchlich an all wider red, vnd daz die arbait vnd der gotesdinst, als vor geschriben ist, dem Pharrer ze sand Michel, der da ist von vnsern wegen, ringer sei vnd decz paz volenten mug, habent vns vnd der chirchen ze sand Michel di pharr leut gechauft vnd gegeben zehen phunt phenning geltes, di man der pharr vnd dem pharrer hincz sand Michel raichen sol, vierstund in dem Jar alle quottemper drithalb phunt alter wienner phenning an all irrung vnd wider red. Vnd daz diser gotesdinst dem vorgenanten gotshaus vnser Vrawn ze Wachaw vnd den pharrleuten dar inne von der Pharr ze sand Michel, als vor geschriben ist, staet vnd vnuerchert beleib, dar vber geb wir disen offen brief versigelten mit vnserm vnd mit dez Conuents anhangunden Insigeln, Vnd ze pezzer sicherheit mit der edeln Herren Insigel vnserr vo^egt Hern Jansen vnd Hern Leuttoltz von Chunring, Obrist schenchen in Osterrich. Der prief ist geben nach Christi gepurd Dreutzehen Hundert Jar, dar nach in dem sechs vnd vierzigstem Jar an dem Liechtmesse Tag.

Source Fulltext: OÖUB 6 (Wien 1972) S. 538f., Nr. 532