Wir Albrecht von Gottes Gnaden Herzog zu O^esterreich, zu Steyr vnd zu Kha^ernden etc. thuen khund offentlich mit disem brief, das wuer mit vnserem getreuen Albrechten von Puchhaimb vberain khomben sein des khauffes vnd des widerwexls, den Wuer mit jhm getan haben vnd haben im vnd seinen leib erben vnser vesten Litschau vnd Haydenreichstain mit gerichten, verlechenten gu^etern, veld, holtz vnd wayd vnd mit allem dem, das dar zue geho^ert, als Wu^er es in nutz vnd gewer hergebracht haben, gegeben vmb die vest Puechaimb vnd was darzue geho^ert, das im zu seinem thail gehe Hansen seinem brueder vnd gehe Henslein von Puechaimb seinem vettern zu rechtem erbe angevallen ist. Er hat vns auch vnd vnsern erben ledig lassen vier vnd dreizzig hundert pfund wienner pfenning, dar fu^er di selben vesten Litschaw vnd Haydenreichstain sein rechtes pfand von vns gewesen sind, des er vnser brief gehabt hat, die er vns wider geben hat in solcher weis, das Wu^er vnd vnser erben dem selben Albrechten von Puechaimb vnd seinen leiberben die vorgenanten vesten Lietschaw vnd Haydenreichstain mit gerichten, verlechenten gu^etern vnd das chirchlehen zu Litschaw, veld, holtz vnd wayd vnd mit allem nutzen vnd rechten, die dar zue gehorent, geliehen haben vnd fu^erbaz leihen sollen zu rechtem lehen, wann er vnd sein erben dieselben vesten vnd was darzue gehort, von vns vnd vnsern erben zu rechtem lehen haben vnd erchennen sollerivnd vns vnd vnsern lieben so^enen Herzog Rudolphen vnd Herzog Friderich vnd vnsern erben zu vnser landes notturften vnd mit andern sachen, als billich ist, wartent vnd beholfen sollen sein. Wu^er haben vns auch vnd vnser erben vnd nachchomen behalten alle edelleut vnd die chirchen lehen der chirchen zu Ragz vnd der chirchen zu Haydenreichstain vnd auch die vogtei der clo^ester vnd gotsha^euser vnd ire gu^eter, die zu den selben vesten geho^erent vnd in den herschaften daselbst gelegen sind, di wu^er in noch seinen erben nicht geliehen haben noch leihen sollen. Dar vmb hat er fu^er sich vnd fu^er seine erben vns vnd vnsern erben vnd nachchomen die vorgenanten vest Puechaimb mit gerichten, verlehnten gu^etern, allen edelleuten, chirchen lehen baide der chirchen zu Vo^echlabruk, sein vnd seiner vodern stu^eftung vnd andern chirchen, di darein geho^erent, vnd auch die chirchen zu Puchenau (sic), veld, holz vnd wayd vnd alle nutz vnd recht, die zu der vorgenanten vesten Puechaimb geho^erent, als er es vnd sein vodern in aigens gewer her bracht habent, vnd auch was er da hat, gegeben zu rechtem aigen, wann er vns auch des sonderlich seinen brief gegeben hat. Wuer sein auch der vorgenanten vest Lyetschau vnd haydenreichstain vnd was darzue geho^ert, als vorgeschriben ist, des egenanten Albrechten von Puechaimb vnd seiner erben recht gewer vnd scherm, als lehens vnd vnsers landes recht ist in O^esterreich. Des geben wu^er zu vrchund diesen brief besigelten mit vnserm insigel, der geben ist zu Wienn an mittich vor sand Gallen tag nach Cristi geburt dreuzehenhundert jar, dar nach in dem acht vnd vierzigisten jar.

Source Fulltext: OÖUB 7 (Wien 1876) S. 74ff., Nr. 75