ICH Janns vonn Capelle vnnd mein sün bede Vlrich vnnd Eberhardt vnnd annder mein erbenn verjechen vnnd thuen khundt allen den die nun sündt vnnd hernach khünfftig werdtenn, die disen brieff sechent vnnd lesenn oder hörent lesen, das ich von der jungckhfrauen weegen der Zelckhnerine dem gottshauss zu Pulgarn den hoff zu Khatzbach geaygent hab mit allem dem, vnnd dartzue gehörtt, wie das genanndt ist, vnnd auch derselbe hoff mier jnn meinem vrbar ledig worden was dieselben aygenschafft ann demselben hoff hab Ich lautterlich durch Gott, mier vnnd meinen voruordern zu ainem saelgerett gegeben zu dem vorgenanndten gottshauss zu Pulgarn, vnnd ist das geschechen mit guettem willenn aller meiner erben also, das ich vnnd meine erbenn khain recht noch khain annsprach ebigclich nimbermehr sollenn gehaben nach dem vorgenanten hoff zu Khatzpach. Das die rött stätt vnnd vnuerkhertt bleib, alss vor verschribenn ist, von vnns vnnd von allenn vnnsern erbenn, geben wier die vorgenanndten ich Janns von Capelle vnnd mein sün baidte Vlrich vnnd Eberhardt disen brieff zu ainem wahren vhrkhunde versygellt mit vnnserer aller dreyer annhanngundten jnnsygelln. Der brieff ist geben, da man zallt von vnnsers herrn Christus gebuerdte dreytzechen hundert vnnd jnn dem neunvnndviertzigistenn jahrn ann St. Anngness tag.

Source Fulltext: OÖUB 7 (Wien 1876) S. 91, Nr. 92