Ich Jans von Durnaechting vnd mein hausvrow vro Diemu^et vnd ich Wernhart von Hausmenning vnd mein hausvrow vro Margret vnd mit vns all vnser erben, di wir haben oder noch chumftichleich gewinnen, ez sein su^en oder to^echter, wir vergehen offenleich an disem prief vnd tuen chunt allen den, di in sehent oder horent lesen, di nu sind oder hernach chumftig werdent, daz wir mit wol bedachtem muet vnd mit rat, gunst vnd willen aller vnserr erben ze chauffen haben geben den ersamen herren vnd dem gotshaus datz sand Florian zway guet datz Ho^ehenperig gelegen pey Hohenstein in der Riedmarch, di vnser vreyz aygen gewesen sind, vmb viertzk phunt wienner phenning, der si vns gancz vnd gar gericht vnd gewert habent, vnd haben in di vorgenanten guet geben mit allen den rechten vnd nuczen, vnd wir sev haben gehabt, versucht vnd vnuersucht, ze holtz vnd ze veld. Wir schullen auch der vorgenanten guet ir gewer sein fur all ansprach, wo si vns dar u^ez vordernt. Taeten wir des nicht, wittanen schaden sev des na^emen, den schu^ellen sev haben auf vns vnd auf aller vnserr hab, di wir haben in dem land. Waer aber, daz der oftgenanten guet iemant pezzer erib wolt sein, der schol dem egeschriben gotshaus geben vierczk phunt wienner phenning vnd waz di selben guet gepezzert sind, daz schol er auch dem gotshaus nach vier man rat widercheren. Vnd daz di red stet vnd vnuerchert beleih, Dar v^eber geben wir disen prief versigelten ich Wernhart von Hausmenning mit meinem anhangunden insigel vnd ze pezzrer bezeugnuss mit hern Albers insigel des Premzzer, so verpint ich mich Jans von Durnechting vnd mein hausvrow vnd vnser erben vnder ir paider insigel, wand ich aygens insigels nicht enhan, vnd zu^e einer pezzern sicherhait hab wir gepeten dinstleich den ersamen herren hern Reynprechten von Walsse, der zden zeiten herr vnd vogt in der Riedmarch gewesen ist, daz der sein insigel ze bezeugnuss dar an gehangen hat. Der brief ist geben nach Christs gep/erd v^eber drevzehen hundert jar, dar nach in dem nevn vnd virzigisten jar an vnser vrown tag zder chu^endung.

Source Fulltext: OÖUB 7 (Wien 1876) S. 98f., Nr. 101