Ich Hainreich ze den zeiten pfarrer ze Veldchirchen vergich vnd tu^en chunt offenbar an disem brief allen den, di in sehent oder ho^ernt lesen, daz ich ain gu^et, daz haizzet an dem aynperg vnd gelegen ist bey Veltchirchen, han gechauft vmb mein aigenhaft gu^et also daz ich damit mag geschaffen meinen frum, wie mier geuellet, vnd von dem man raichet alle iar meinen genaedigen vrawn ze Nidernburch dacz Pazzaw ein halbs phunt alter wienner phenning an vnser vrawn tag ze der dienstzeit ze rechtem pu^erchrecht. Daz selb gu^et han ich mit wolbedachtem mu^et ze der zeit, do ich ez wol getu^en macht, geben meinem egenanten gotshaus ze Veltchirchen also, daz ez ein pharrer, swer nach mier chu^enftig wiert, schol inne haben ewichleich mit allen nutzzen. Mit sogetaner beschaidenhait, daz er schol begen alle iar den tag vnd die hochzeit der heiligen iunchfrawn saad Dorothen, an dem selben tag, dar an ir hochzeit geuellet oder darnach inner acht tagen mit sechs priestern, vnd schol an dem abent singen vesper vnd dez nachtes metten vnd des morgens singen ein ampt vnd f/enf mess sprechen der egenanten iunchfrawn sand Dorothen, vnd schol iedem priester raichen nach dem essen zehen phenning wienner oder pazzawer m/enzz. Ez schol auch der pharrer, der ze den zeiten ist, begen alle iar ewichleich den tag, dar an ich stirb, aber mit sechs priestern oder dar nach inner acht tagen, vnd schol mier dez abentz singen vigili vnd des morgens ein selmess singen vnd f/enf mess sprechen meiner sel vnd allen den, di mir entpholichen sind, ze trost vnd ze hail, vnd schol aber yedem priester raichen nach dem ezzen zehen phenning wienner oder pazzawer m/enzz. Wa^er aber, daz der pharrer, der ze den zeiten ze Veltchirchen ist, daran sa^eumig wa^er vnd daz alles v^eber gieng oder einen tail, als vor geschriben stet, so schu^ellen sich die zechmaister vnd die pesten in der pharr, die datz Veltchirchen gesezzen sind, dez vorgenanten gu^etz vnd holtzzes an dem aynperg vnderwinden vnd daz inne haben als long, vntzt daz alles daz eruollet wiert gantz vnd gar, daz von dez pharrer wegen versaumt ist. Wenn daz aber geschiecht, so schu^ellen si fu^erbaz dar auf nicht mer haben ze sprechen, ez wu^erd denn di saumchait mer gea^euert. Wa^er aber, daz die pharrla^eut vnd die zechmaister dar an sa^eumig wa^eren vnd wolten dez nicht tu^en einem pharrer ze lieb, so schu^ellen sich mein genaedig frawn ze Nidenbu^erch ze Pazzaw dez selben gu^etes vnderwinden vnd daz inne haben vnd alles, daz vor geschriben stet, begen in ierem gotshaus datz pazzaw. Wa^er aber, daz mein vorgenant vrawen daz, daz vorgeschriben stet, nicht mo^echten noch wolten begen, so schol sich daz gotshaus datz sand Florian vnd die herren da selbs dez oftgenanten gutes vnderwinden vnd daz inne haben vnd da von in irem gotshaus datz sand Florian begen alles, daz vorgeschriben stet, vnd auch den egenanten vrawn ze Nidenburch datz Pazzaw ein halbes phunt wienner phenning an vnser vrawen tag zu der dienst zeit da von ze pu^erchrecht raichen. vnd schol dann der pharrer noch die pharrla^eut ze veltchirchen an dem vorgenanten gu^et vnd holtzz an dem aynperg dhain recht noch ansprach nimmermer gewinnen. Vnd daz daz sta^et vnd vnuerehert beleih, als vor beschaiden ist, dar vber gib ich disen offen brief mit meinem anhangundem insigel, dar zu ze einer pezzern sicherhait han ich gepeten dienstleich die ersamen mein gena^edig vrawen ze Niderburch datz Pazzaw vnd meinen herren probst Hainreich von sand Florian, daz die ier jnsigel ze zeugnu^ess dar an gehangen habent. Der brief ist geben nach Christes gepu^erd vber dreutzehen hundert iar, darnach in dem na^eun vnd viertzkistem jar an sand Gorgen tag.

Source Fulltext: OÖUB 7 (Wien 1876) S. 102ff., Nr. 104