Guido miseratione diuina tituli sancte Cecilie presbyter Cardinalis apostolice sedis legatus dilectis in christo . . preposito et conuentui monasterii sancti Floriani ordinis sancti Augustini Patauiensis diocesis salutem in domino. Cum a nobis petitur, quod iustum est et honestum, tam uigor equitatis, quam ordo exigit rationis, ut id per solicitudinem officii nostri ad debitum perducatur effectum. Sane petitio vestra nobis exhibita continebat, quod bone memorie Albertus olim Episcopus Patauiensis ex certis iustis et rationabilibus causis de consensu et uoluntate sui capituli statuit et ordinauit, quod rector ecclesie Walckirchen dicte diocesis, in qua ius patronatus habetis, qui pro tempore esset, predicto vestro monasterio quatuordecim libras vsualis monete deberet perpetuis temporibus ministrare. Propter quod nobis humiliter supplicastis, ut ordinationem prefatam confirmare de speciali gratia dignaremur. Nos igitur vestris supplicationibus grato concurrentes assensu ordinationem prefatam per predictum Patauiensem episcopum, ut premittitur, factam, sicut iuste et prouide factu fuit, ratam et gratam habentes auctoritate, qua fungimur de dono spetialis gratie tenore presentium confirmamus et presentis scripti patrocinio communimus. Nulli ergo omnino hominum liceat hanc paginam nostre confirmationis et communitionis infringere uel ei ausu temerario contraire. Si quis autem hoc attemptare presumpserit, indignationem omnipotentis dei et beatorum Petri et Pauli apostolorum eius se nouerit incursurum. Datum apud Neumburgam Patauiensis diocesis V kalendas augusti pontificatus domini Clementis pape VI anno octauo.

Source Fulltext: OÖUB 7 (Wien 1876) S. 119f., Nr. 120