Ich Jans der Schechk von Styr vnd mein hausvraw vro Agnes vnd mein sun Heinreich vnd all vnser erben, di wir haben oder noch gewinnen, veriehen vnd tu^en chunt offenbar an disem prief allen den, di in sehent oder horent lesen, di nu sind oder hernach chu^emftig werdent, daz wir mit wolbedachtem mu^et vnd nach rat vnd mit willen vnd gunst aller vnser vreunt vnd besunderleich Vlreichs vnd Hertweigs hern Hainreichs sun des Chaisers, dem Got genad, meiner swa^eger vnd aller irer erben, di si habent oder noch gewinnent, gu^etleichem willen verchauft haben zder zeit, do wir iz wol getun mochten, vnser vischwaid an dem Hag paj der Traun, di mir vorgenanten Jansen dem Schechken geuallen ist an rechtem tail von meinem sweher hern Hainreichen dem Chaiser, dem Got genad, di im warden ist von hern During dem Piber, vnd di ich von meinem genadigen herren herczog Albrechten von Osterich han ze lehen mit allev dev, vnd dar zu^e gehort, versuecht vnd vnuersuecht mit allen nuczen vnd rechten, als wir sev haben inn gehabt, dem ersam gotshaus dacz sand Florian vnd der sampnung da selb vmb hundert phunt alter wienner phenning, der wir gancz vnd gar gericht vnd gewert sein. Wir veriehen auch vnd schu^ellen der vor geschriben vischwaid vnd allev dev, vnd dar zu gehort, gewer sein vor recht an aller stat, wo des dem egenanten gotshaus dacz sand Florian durft geschiecht nach landes recht. Na^em auer daz oft genant gotshaus vnd di sampnung dhainen schaden dar an, den schull wir in ab legen vnd widercheren gancz vnd gar, swo wir in des ab giengen, daz schullen si haben auf vns vnd auf vnsern erben vnd allrer vnserer hab, di wir haben in dem land ze O^esterreich. Wer auer ieman vnter vnsern erben oder nachchomen, di recht wolten haben an der vischwaid vnd dar nach sprechen, der schol dem oftgenanten gotshaus dacz sand Florian geben zwai hundert phunt wienner phenning vnd schol sich der vischwaid vnterwinden vnd schol dann daz gotshaus dar auf nicht mer haben ze sprechen. Vnd daz disev wandlung vnd der chauf als vor geschriben stet, ewichleichen sta^et vnd vnuerchert beleib, dar vber gib ich vorgenanter Jans der Schechk disen offen prief mit meinem vnd mit meiner vorgenanten swa^eger Vlreichs vnd Hertweigs der Chaiser anhangundem insigel, vnd durch pezzer sicherhait dem oftgenanten gotshaus haben wir dienstleichen gepeten den erbern vnd wirdigen herren hern Eberharten von Waltse hauptman ob der Ens vnd vogt des selben gotshaus, daz der sein insigel dar an hat gelegt zu einem ewigen gezeug vnd sicherhait der vorgenanten wandlung. Der prief ist geben nach Christ gepurd drevtzen hundert jar, darnach in dem nevn vnd vierczigistem jar an sand Merteins tag.

Source Fulltext: OÖUB 7 (Wien 1876) S. 154f., Nr. 155