Ich Dietreich der Stainpekch vnd mein geswistreid vnd alle vnser erben wier veriehen vnd tu^on chunt offenbar an dem brief allen den, di in sehent oder ho^ernt lesen, die nu lebent oder hernach chunftig sind, daz wier mit wol bedachtem mu^ot vnd mit all vnsrer erben gu^otleichen willen vnd nach vnserr pesten freunt rat verchauft haben die halben hu^eb ze Tidendorf, die gelegen ist in Wartperger pharre vnd vnser vreys aigen gewesen ist, dem erbern herren herren Hainreichen ze den zeiten pharrer ze Guttawe vnd dem gotshaus da selb vnd dem chloster datz sand Florian, von dem daz gotshaus lehen ist, mit allen den nu^etzzen, die dar zu^e geho^ernt ze holtzz vnd ze veld, versu^echt vnd vnuersu^echt, als wier vnd vnser vodern ez gehabt haben, vmb dreu zehen phunt phenning alter wienner mu^enzz, der wier gantz vnd gar gericht vnd gewert sein also beschaidenleich, daz wier schu^ellen der vorgenanten hu^eb dez vorgenanten pharrer vnd dez gotshaus vnd dez chloster, di vor genant sint, gewer sein an aller stat fu^er alle ansprach vnd fu^er allen chu^enftigen chrieg also lantzrecht ist ze O^esterreich. Ta^et wier dez nicht, wie getanen schaden der vorgenant pharrer oder die gotshau^oser, die vor genant sint, dez narnen, ez sey mit potscheften, mit nachraisen oder mit welherlay sachh daz sey, den si gesprechen mu^egen bey iern trewen, den selben schaden schu^ellen wier in gantz vnd gar ab tu^en vnd schu^ellen si das haben auf vnsern trewen vnd auf aller vnsrer hab, die wier haben in dem lant ze O^esterreich, versu^echt vnd vnuersu^echt, wo si die geaischent auf lant oder auf wazzer, daz dem vorgenanten pharrer vnd dem gotshaus ze Gu^otawe vnde dem chloster datz sand Florian di rede vnd die wandlung also sta^et vnd vnuerchert beleib, darv^eber gib ich vorgenanter Dietreich der Stainpekch in disen offen brie versigilt mit meinem anhangundem insigel versigilt (sic) vnd mit dez erbern herren hern Vlreichs von Pernawe ze den zeiten lantrichter in der Riedmarich anhangundem insigel iem vngolten (sic) ze einem gezeug für allen chünftigen chrieg. Der brief ist gegeben, do man zalt von Christus gepu^erde dreutzehen hundert iar, darnach in dem fu^enftzhistem iar an sand Giligen tag.

Source Fulltext: OÖUB 7 (Wien 1876) S. 198f., Nr. 197