Guido miseracione diuina tituli sancte Cecilie presbiter cardinalis, apostolice sedis legatus dilectis in christo preposito et conuentui monasterii sancti Floriani ordinis sancti Augustini Patauiensis diocesis salutem in domino. Cum a nobis petitur, quod iustum est et honestum, tam uigor equitatis, quam ordo exigit racionis, ut id per sollicitudinem officij nostri ad debitum perducatur effectum. Sane peticio uestra nobis exhibita continebat, quod dudum bone memorie Wernhardus olim episcopus Patauiensis parrochialem ecclesiam in Ryed, in qua uos ius patronatus habetis, predicto uestro monasterio ex certis iustis et racionabilibus causis de capituli sui consensu uniuit et eciam incorporauit, nobis humiliter supplicantes, ut unionem et incorporacionem prefatas confirmare de speciali gracia dignaremur. Nos igitur uestris supplicacionibus grato concurrentes assensu unionem et confirmacionem prefatas per predictum Patauiensem episcopum, ut premittitur, factas, sicut iuste et prouide facte sunt, ratas et gratas habentes auctoritate, qua fungimur, de dono specialis gracie tenore presencium confirmamus et presentis scripti patrocinio communimus. Nulli ergo omnino hominuin liceat hanc paginam nostre confirmacionis infringere uel ei ausu temerario contraire. Si quis autem hoc attemptare presumpserit, indignacionem omnipotentis Dei et beatorum Petri et Pauli apos torum eius se nouerit incursurum. Datum apud Nuemburgam Patauiensis diocesis V. kalendas Augusti pontificatus domini Clementis pape VI. anno octauo.

Source Fulltext: OÖUB 7 (Wien 1876) S. 193f., Nr. 192